Reunion Interparlamentario di Reino (IPKO) di 1 pa 5 di juni na Hulanda

Di diahuebs 1 di juni pa dialuna 5 di juni 2023, Reunion Interparlamentario di Reino (IPKO) ta tuma laga na den Haag. Durante IPKO, e delegacionnan di Aruba, Curaçao y Sint Maarten y Hulanda ta reuni pa debati riba tema cu ta afecta e paisnan den Reino. E temanan di e IPKO aki ta cambio climatico y adaptacion na esaki, educacion, e proximo Conferencia di Reino, seguridad di data den Reino y  superacion y procesamento di colonialismo y pasado di sclabitud.

Agenda

Diahuebs 1 di juni

E reunionnan ta cuminsa diahuebs 1 di juni 2023 cu e apertura na Nieuwspoort. Eynan, e lidernan di e delegacionnan di e paisnan den Caribe y e lider di e delegacion di Hulanda ta duna presentacion tocante e ultimo acontecimentonan den e cuatro paisnan. Despues ta sigui un intercambio di punto di bista tocante seguridad di data den Reino.

Diabierna 2 di juni

Diabierna 2 di juni, IPKO ta reuni den e sala plenario di Tweede Kamer. Eynan lo debati tocante e elaboracion di e recomendacionnan di e Rapport di conclusion di Comite Consultivo Grupo di Dialogo tocante Sclabitud. Pa esaki, e delegacionnnan di IPKO ta intercambia idea cu, entre otro, e kwartiermakernan di Museo Nacional di Sclabitud. E dia aki tambe lo debati riba cambio climatico y maneho di Reino riba esaki. E kwartiermaker di Mesa di Clima di Boneiro lo duna un presentacion tocante su conseho cu a keda publica recientemente riba e tema aki. Ademas, e delegacionnan lo debati riba educacion den Reino y e medida adopta a base di e rapport di e Ombudsman Nacional ‘Dolor di cabes di studiantenan Caribense’ (‘Kopzorgen van Caribische Studenten’). E Ombudsman lo duna un presentacion tocante esaki.

Diasabra 3 di juni

Diasabra 3 di juni, IPKO lo realisa un bishita di trabou na Delft. Riba agenda tin un bishita na e ‘Green Village’ di e universidad Tecnologico, un ‘field lab’ pa innovacion sostenibel den entorno urbano.

Dialuna 5 di juni

E reunionnan interparlamentario ta finalisa dialuna 5 di juni cu adopcion y firmamento di e lista di palabracion y un rueda di prensa conhunto cu e presidentenan di e cuatro delegacionnan.

Pa gran parti por sigui e reunionnan entre e delegacionnan bibo y directo a traves di livestream riba e web page di Nieuwspoort https://www.nieuwspoort.nl/stream/ipko (diahuebs) y riba e web page di Tweede Kamer a traves di e Canal di Actualidad (diabierna y dialuna) https://www.tweedekamer.nl/vergaderingen/livedebat/actualiteitenkanaal.