MAN-PIN ta kana un kaminda i frakshon di MAN den Parlamento ta un frakshon serio.
Ningun momento Frakshon di MAN a indiká di ta kontra introdukshon di un lei pa online
gaming kaminda ta duna un empuhe ekonomiko na nos pais i kreashon di kupo di trabou.
Den parlamento a trata e lei 2 biaha i na e momento aki ta na gobièrnu pa kontesta
preguntanan di miembronan di Parlamento.
Parlamento tabata kritiko riba e lei basa riba konseho di Raad van Advies, Orden di Abogado
i e sektor di gaming esta Trust Unie ku a mustra nan preokupashon grandi riba e lei den e
forma ku minister Silvania a kambi’e. Den parlamento tantu koalishon i oposishon tabata
hopi kritiko riba e lei presentá pa Minister di Finansa Silvania. E kritikanan ta entre otro ku
tin falta total di transparensia kon ta duna enkargo na kompanianan den eksterior. Mas
ainda paso no ta garantisá privasidat di hende i no ta regla kon ta atende ora tin disputa
entre kompanianan i Gobièrnu.
Ademas minister Silvania mester splika pueblo di Kòrsou kon por ta ku su proposishon ta
laga nos pèrde plaka i krea kupo di trabou pa otronan den eksterior i lubida riba nos mes
yunan di tera.
Den e reunion di Tweede Kamer kaminda a trata e tratado fiskal entre Kòrsou i Malta, nos
Lider Politiko i miembro di Parlamento Giselle Mc. William a hiba un disertashon na nivel
kaminda den palabra kla a defende interes ekonomiko, sosial di nos pais. Giselle a enfatisá
pa investiga si aprobashon di e tratado aki lo por tin konsekuensia pa nos mirando tur loke
Malta ta keda akusá di dje komo paraiso fiskal.
Na ningun momento sra. Mc. William a pidi Hulanda pa intervení of tuma tarea di nos pais
over. Lokual ku MFK kier hasi ta purba manipula i engaña pueblo i esaki nos ta korta den
tòm.
E Minister Hulandes a reakshona riba miembro di Tweede Kamer Hulandes C.S. Idsinga i no
tin nada di haber ku sra Mc William su intervenshon den Tweede Kamer.
MFK mester stop di manipula i trese kosnan dilanti ku no ta bèrdat. Lei di LOK ta den skochi
di Minister Silvania i su partner di koalishon PNP ku tambe a hasi hopi pregunta riba e lei
kual ta stroba yunan di tera haña trabou of eherse funshonnan kual nan a studia pe i
preparanan mes manera abogado.
Reunion di tweede kamer no tin nada di haber ku online gaming
