Evaluashon di plan di akshon
Tourism Corporation Bonaire (TCB), huntu ku su partnernan Entidat Públiko Boneiru, Bonaire Hotel and Tourism Association (BONHATA), Bonaire International Airport (BIA) i Kapitan di Haf, a tene su di dos reunion di stakeholder pa aña 2023.
E direktor di TCB, Miles Mercera, a kompartí e bista general di prestashon pa e di dos kuartal di aña 2023. Pa aña 2023 a base di e Plan Maestro pa Turismo a fiha e kantidat aspirá di bishitante na 170.000. A base di nos indikadónan krítiko di prestashon (Kpi) te na luna di mei mas òf ménos 76.552 bishitante a bishitá nos isla, i e sifranan pa loke ta trata e pais di prosedensia ta mustra ku 48% ta bini for di Hulanda, 23,5% for di Merka, 15% for di e anterior Antia Hulandes i e sobrá for di vários otro pais. TCB a plania diferente kampaña ‘co-op’ ku KLM, TUI i Corendon pa e merkado oropeo, miéntras ku tin vários kampaña tambe planiá pa e merkado norteamerikano, manera ‘co-op’ ku Expedia, kampaña di Flash Flamboyance etc. Sr Mercera a kompartí tambe algun aktualisashon tokante konekshon aéreo, inkluso e anunsio di buelo di Winair pa nos isla, i tin kòmbersashonnan ta tumando lugá ku partnernan aktual i partnernan nobo di aviashon. Otro proyektonan i eventonan binidero na nos isla, manera e Bonaire Tourism Summit i Bonaire Tourism International Conference tambe a bini dilanti.
Veroesjka de Windt, direktor di BONHATA, a kompartí diferente aktualisashon tokante e prestashon di akomodashon, ku un grado di okupashon promedio di 71% te ku awor pa e aña akí. Pa komparashon: aña 2022 tabatin un grado di okupashon promedio di 76%, miéntras ku na aña 2019 a midi un grado di okupashon promedio di 77%. E tarifa promedio pa dia (ADR) pa aña 2023 ta $ 246. Kompará ku aña pasá e tarifa promedio pa dia tabata $ 225. E rendimentu pa kada kamber disponibel pa aña 2023 ta $ 176. Kompará ku aña 2022 esaki tabata $ 163.
Maarten van der Scheer, direktor di BIA, a trese dilanti ku pa e promé mitar di aña 2023 Flamingo Airport a raportá un kresementu di e kantidat di pasahero di mas ku 8%, kompará ku aña pasá. A plania mehorashonnan grandi na e fasilidat aktual i nan ta den konstrukshon kaba. Aktualmente ta renobando e karusel di ekipahe i ta hasié mas grandi i e sala di yegada tambe ta bira mas grandi. E inisio di buelo di Winair pa Sint Maarten na luna di yüli ta mehorá e konektividat ku e islanan di Isla Riba. Na e momentu akí aeropuerto ta trahando riba e skema di buelo pa e próksimo wenter i ta enfoká riba rutanan i frekuensianan nobo, prinsipalmente pa Nortamérika.
Kapitan di Haf Gunther Flanegin a presentá e datonan mas resien pa luna di òktober te luna di mei 2023, ku ta mustra ku en total 171 barku krusero a bishitá nos isla, ku en total 423.000 bishitante. El a kompartí tambe ku na aña 2023 tabatin en total 5 barku ku a bishitá Boneiru pa promé biaha, e asina yamá ‘first call’, esta Ritz-Carlton Evrima, Carnival Celebration, Norwegian Prima, Royal Rhapsody of the Seas i Ponant Le Ballot.
Komo parti di e Plan di Rekuperashon di Turismo e stakeholdernan a kuminsá ku e konferensianan konhunto di kada tres luna tokante turismo, ku komo meta pa promové e kolaborashon i informá nos komunidat lokal tokante desaroyonan den sektor turístiko. Den koperashon ku su stakeholdernan, TCB lo sigui informá nos komunidat kada tres luna tokante desaroyonan, oportunidatnan i desafionan den sektor turístiko.
