Gerente di Kuerpo Polisial Hulanda Karibense (‘Korpsbeheerder’) a duna un agente polisial retiru
inkondishonal debí na inkumplimentu serio ku deber. E inkumplimentu ku deber a bini dilanti den un
investigashon disiplinario ku a inisiá despues ku kuerpo a haña informashon tokante uso inadekuá di
arma reglamentario di servisio dor di un empleado.
Den e promé dianan di 2024, mando di kuerpo a risibí informashon ku e agente polisial en kuestion a
saka su arma di kandela reglamentario durante un insidente den e mardugá di djadumingu 31 di
desèmber pa djaluna promé di yanüari na un establesimentu di hóreka na Saba. E informashon aki a
kondusí na tantu un investigashon disiplinario dor di Ofisina di Asuntunan Interno (Bureau Interne
Zaken – BIZ) di KPCN komo tambe un investigashon penal dor di Reshèrshi di Reino (Rijksrecherche).
E último aki pa motibu ku a drenta keho kontra e empleado en kuestion.
Inkumplimentu serio ku deber
Mientrastantu a kompletá e investigashon disiplinario. E investigashon ta mustra ku e empleado ta
responsabel pa inkumplimentu serio ku deber i ku su komportashon ta demostrá un aktitut ku no ta
kuadra komo un polis. Inkumplimentu ku deber ta referí na no kumpli ku obligashonnan imponé,
violashon di instrukshon, òf e hasí òf no hasi di algu ku un bon empleado públiko mester a evitá di
hasi òf hasi den sirkunstansianan similar. E komportashon aki ta varia entre negligensia leve te ku
violashonnan serio di regla i instrukshon.
Mando di kuerpo ta enfatisá ku no ta aseptá un komportashon komo tal i no ta tolerá esaki den e
organisashon. Uso ilegal di un arma reglamentario di servisio ta forma un menasa serio pa seguridat i
konfiansa den e kuerpo.
A pone e empleado riba nòn-aktif for di komienso di e investigashon disiplinario, pues, e no a traha e
último periodo. Na komienso di mei ela haña e intenshon di su retiru inkondishonal i despues e
tabatin seis siman pa presentá un opheshon. Despues ku e periodo di opheshon a kaduká, e retiru ta
definitivo. Debí ku e investigashon penal di e kaso ainda ta kana, no ta muchu kla si tin
konsekuensianan penal tambe pa e empleado.
“Inkumplimentu ku deber tin konsekuensianan konsiderabel”
Hefe di kuerpo, Alwyn Braaf tokante di e kaso: “Anteriormente e aña aki, relashoná ku un otro kaso
disiplinario, mi a duna klaramente di konosé ku integridat ta un tema importante den kua nos komo
mando di kuerpo ta enfoká. Integridat ta finalmente e base di un aktuashon polisial profeshonal i
responsabel. I pues, mi por ta korto tokante di esaki: pa komportashon no-profeshonal i
iresponsabel, no tin lugá den nos organisashon. E trabou di polis ta sigui ta un trabou humano i
hende por kometé fayo. Sinembargo, inkumplimentu ku deber ta un violashon serio di normanan
profeshonal di un empleado públiko di polis i pa e motibu ei esaki tin konsekuensianan konsiderabel.
Nos ta investigá notifikashonnan asina aki kuidadosamente i ta tuma medida adekuá riba esaki.
Mando di kuerpo ta haña e retiru apropiá i inevitabel. Pa nos komunidat i organisashon, nos ta
obligá di tuma e tipo di pasonan aki i pa ta habrí i transparente tokante di nan.”
Retiru inkondishonal di agente polisial debí na inkumplimentu serio ku deber
