Ta spera di por tin bon cooperacion y conbersacionnan cu tur departamento den area di Husticia den e proximo 4 añanan”
Minister di Husticia y Asuntonan Social, Rocco Tjon a duna un resumen di e prome dianan di trabou indicando tambe e retonan den e dos areanan aki. Den e prome siman ya caba Minister Tjon a cuminsa sinta cu e sindicatonan cu tin representantenan den area di Husticia of Asuntonan Sociaal. Total tin mas o menos 60 departamento of fundacion cu ta cay bou di e carteranan aki y ta imporante pa scucha nan pa asina haña un bon conocemento di nan mes kico nan tin como prioridad.
Obviamente como Minister y como Gobierno nos tin nos vision loke nos kier logra e 4 añanan nos dilanti pero mi ta kere ta hopi importante tambe pa incorpora e ideanan di e trahadonan mes den e vision aki. P’esey un carta a wordo manda pa tur director, presidente y hefe di departamento pa despues entrega un ‘startnotitie’ pa asina nos por tene cuenta cu tur nan puntonan den e ‘beleidsvoornemen’ cu ta cuminsa den Presupuesto 2022 cu ta un ehercicio cu ta andando aworaki”, Minister Tjon a duna di conoce.
INDEPENDISA SCOL DI POLIS:
E titular di Husticia a duna di conoce cu tin diferente cambio importante cu su Ministerio lo kier trece padilanti. Lo instala diferente comision di trabou pa un decreto ministerial den e proximo dianan. Un di e comisionnan ta pa logra independisa e Scol di Polis. E Minister a remarca cu tur partner den Husticia ta haña esaki un bon idea pa motibo cu esaki ta baha gastonan pero lo ofrece un eneseñansa di calidad mas halto ainda pa ful e cadena di husticia pero tambe pa e sector publico den su totalidad. Esaki ta un ehercicio cu lo cuminsa y mestrer culmina den un academia di husticia.
FONDO DI ASISTENCIA PA VICTIMA DI DELITONAN RELACIONA CU VIOLENCIA
Den su maneho, Minister Tjon kier introduci pa otro aña caba un fondo pa duna asistencia na victimanan especialmente victima di delitonan relaciona cu violencia. Esaski ta un concepto cu ta conoci na Hulanda y na Boneiro. E Minister tin tur confiansa cu esaki ta un iniciativa sumamente bon pa victimanan di delitonan cu tin un aspecto di violencia incorpora den dje y ta un idea cu ta wordo carga tambe door di Procurador General.
JUSTITEEL VIERLANDEN OVERLEG
Un reunion importante tambe cu a tuma luga ta e ‘Justiteel Vierlanden Overleg’ cu ya pa hopi aña ta tumando luga y obviamente ta necesario pa tin continuidad di esey. Importancia di esaki ta cu tin un agenda strategico cu ora di bay e reunionnan na Hulanda tambe den e ‘Justiteel Vierlanden Overleg’, por tin e puntonan di agenda cu ta importante pa Aruba. Un punto crucial ta e retonan cu Aruba ta wordo confronta cu ne na nos frontera.
Ayera mes nos tabata tin un caso y mi mester bisa, hopi bon trabou y cooperacion entre Guarda Costa y Cuerpo Policial caminda bo ta wak mas y mas nan ta cuminsa traha miho cu otro caminda a logra gara personanan cu a purba drenta Aruba. Asina bo ta mira mas y mas e instrumentonan cu a wordo poni na disponibilidad di tur e departamentonan aki manera un radar, mas boto riba lama y e helicopter. Bo ta mira nan ta mas sincronisa cu otro pa por traha miho cu otro”, Minister Tjon a duna di conoce.
UZO DI NOS ARUMILLERSNAN:
Un punto hopi importante tambe ta uzo di nos Arumillersnan. Minister di Husticia a expresa su satisfaccion cu tur e departamentonan den e cadena ta particamente wak e balor agrega tambe den e grupo aki. Den un futuro cercano lo bay wak tambe un maneho con lo por bay utilisa e coleganan aki miho den tur e retonan cu Aruba a wordo confronta cu ne. Esaki tambe ta un di e exigencianan of peticionnan di Hulanda den e landpspakket.
KLAS NOBO PA BRANDWEER Y INMIGRACION:
Minister Tjon a duna di conoce tambe cu dentro di poco lo haci anuncio caminda lo bay start un klas nobo pa Brandweer cu tin reto di vergrijzing den e departamento y otro klas pa Inmigracion cu pa hopi tempo caba tin e reto di falta di personal. Pa esaki ya tin fondonan presupuesta y e klasnan ta sumamente necesario pa e departamentonan aki.
Mi ta wak bek riba dos siman di trabou hopi druk pero sigur fructifero na unda hopi informacion a wordo treci dilanti door di e departamentonan. Mi ta gradici nan tur pa e tempo cu nan ta pone pa reuni cu mi y ta spera tambe di por tin bon cooperacion y conbersacionnan cu tur departamento den area di Husticia den e proximo 4 añanan”, Minister Rocco Tjon a duna di conoce.
