Prestashon mensual di turismo na Boneiru
Dia di Rincon ta pusha Boneiru su prestashon turístiko manda haltu den luna di aprel
Tourism Corporation Bonaire (TCB) ta anunsiá ku den luna di aprel 2023 Boneiru a yama bon biní na en total 15.411 bishitante ‘stayover’. Den luna di aprel di aña 2019 a registrá 14.100 bishitante ‘stayover’. E aña akí a registrá 9% mas bishitante ‘stayover’ kompará ku luna di aprel di aña 2019. E dos merkadonan di prosedensia mas grandi pa nos isla ta e bishitantenan hulandes, en total 6701 (43%) i e bishitantenan merikano (21%). Nos bishitantenan ‘stayover’ hulandes ta prinsipalmente prosedente di e provinsianan den parti sùit i parti nort di Hulanda, miéntras ku mayoria di nos bishitantenan ‘stayover’ for di Merka ta bini for di e siguiente seis estadonan: Florida, New York, California, Pennsylvania, North Carolina i Texas. Mas aleu 2832 di tur e bishitantenan pa Boneiru tabata prosedente di nos isla besiña Kòrsou.
Aruba tambe a bini dilanti komo merkado prominente pa Boneiru, ku 562 bishitante ‘stayover’ den luna di aprel, di manera ku luna pasá Aruba a bira e di kuater merkado ku a presta mas mihó. E festividatnan kultural di nos isla, manera Dia di Rincon, a hunga un ròl importante pa loke ta trata atrakshon di mas bishitante for di e anterior Antia Hulandes, loke a hasi e oferta diverso di turista na nos isla mas grandi ainda.
Merkadonan sekundario, entre otro Alemania, Canada, Bélgika, Reino Uní i Suisa, a mantené nan partisipashon den merkado den luna di aprel 2023, komparabel ku luna di mart 2023.
Kontinuamente TCB ta evaluá e situashon di nos industria di turismo pa medio di vigilá e indikadónan mas importante di prestashon i kompará esakinan ku e situashon di promé ku e pandemia. Awor akí aña 2019 ta sirbi komo barometer pa midi turismo na nos isla.
Bishitantenan for di Merka a keda un promedio di 7 anochi i e bishitantenan for di Hulanda a keda un promedio di 14 anochi. Mas aleu mayoria turista merikano ta di edat mediano (55+), miéntras mayoria turista hulandes ta 45+.
Na luna di mart 2023 29 barku krusero a bishitá Boneiru, ku en total 67.625 pasahero.
Por haña e último aktualisashonnan pa e temporada di krusero binidero riba e wèpsait www.bonaire.portcall.com.
Bishitá www.bonaireisland.com òf tuma kontakto ku nos via info@bonaireisland.com pa mas detaye i estadístika.