Restauracion of destruccion di mangelnan

Na mei di e aña aki, redaccion di E Arubiano News a tuma nota di un publicacion riba rednan social unda cu Fundacion Parke Nacional Aruba (FPNA) ta trahando duro pa restaura e mangelnan na Mangel Halto hunto cu e sosten di Ministerio di Naturalesa, Minister Ursell Arends y ayudo di mariniers. Segun e publicacion riba rednan social, ta trahando den colaboracion cu ATA y Ministerio di Turismo tambe pa cambia e palapa y gazebonan pa asina acomoda nos bishitantenan mihor. Recientemente E Arubiano News a bishita Mangel Halto, y por a nota mesora cu tin bastante destruccion den e area unico aki di Mangel Halto.

E Arubiano News por a compronde for di e publicacionnan riba red social di Fundacion Parke Nacional Arikok (FPNA) cu e area terestre y marino protegi di Mangel Halto tin un balor natural, cultural y economico halto. Tambe, ta di importancia pa trese un balansa bek den conserva y maneha e area aki den un manera sostenibel ta parti di e vision di FPNA. E nomber di e area aki ta accentua e charateristica natural special di e mangelnan. Ta wordo splica cu e canal principal di awa di lama ta wordo habri atrobe pa awa por circula entre e mangelnan. Sin embargo por nota riba e potretnan cu E Arubiano News ta publica cu e relato aki, cu esaki no ta e caso actualmente na Mangel Halto. Ta parce cu tin mester hasi un tiki mas sondeo tocante e mareo y con por adapta e area pa e circulacion di awa pa e mangelnan ta algo continuo y cu no ta depende di un mareo halto.

Segun nos por a compronde, Fundacion Parke Nacional Arikok ta trahando hunto cu Aruba Tourism Authority y Ministerio di Turismo pa cambia e palapa y gazebonan pa asina acomoda bishitane mihor. Pero, desde mei cu a anuncia e embeyecemento di e area di Mangel Halto, ainda na september ta mustra cu e projecto a progresa mucho y ta den e prome fase di ehecucion ainda. Asina mes, Fundacion Parke Nacional Arikok a indica cu algun parti di e beach lo ta partialmente accesibel pa rasonan di seguridad te cu comienso di juni pero cu e puntonan di entrada pa lama lo keda accesibel.

Na e momento aki, e area di Mangel Halto ta mustra bastante destrui. Fuera cu e mangelnan cu tawata mas serca di tera (area di parkeer) a wordo corta drasticamente, tin mas area cu a wordo corta drasticamente. E circulacion di awa di lama rond di e mangelnan no ta optimal y por ultimo e palapanan no ta existi ainda y ta den e fase di e columnanan ainda. E beach of area di santo blanco mei mei di e mangelnan ta completamente disaloca y e barankanan cu a wordo coba pa por a basha e fundeshi di e palapanan ta tur rond den e area unda cu antes bishitantenan di Mangel Halto tawata sinta hunga domino, futbol of disfruta di un rato agradabel den famia.

E Arubiano News a tuma contacto recientemente cu Fundacion Parke Nacional Arikok pa elabora un tiki mas tocante e topico y plannan pa finaliza e area aki di Mangel Halto, pero no a logra haya comunicacion cu e personanan concerni. Naturalmente, ta keda pendiente pa si Fundacion Parke Nacional Arikok ta desea di comparti un update tocante e projecto di Mangel Halto cu E Arubiano News.