Diahuebs 22 di September 2022, Fundacion Digna Laclé Herera, Plataforma hobenan profesional y fraccion di AVP a organisa un simposio sumanente exitoso, cu a establece un pensamento idealistico nobo cu lo forma e base pa e desaroyo di nos comunidad. Dilanti un auditorio yen di interesadonan y varios personahe nan clave den nos comunidad representando e sector social, sindical, comercial y e sector di enseñansa a lansa e tema “Restauration of the Common Good”. (“Bon Comun”) Un elenco di oradornan no-politico cu a wordo invita, for di diferente sector di nos comunidad y diferente angulo spiritual, cada uno a presenta un punto di bista y nan experiencia cu e concepto di “bon comun”. Esaki a percura pa un experiencia sumamente original y cu ta invita pa sa mas, pasobra cu e ta duna un criterio y un direccion diferente pa desaroyo di comunidad.
Den e apertura di e symposio e hoben studiante Wendrick Cicilia, miembro di Plataforma Hobennan Profesional, a duna un bista di e concepto di “bon comun” y e necesidad pa recupera norma y balor nan importante manera civismo, solidaridad, empatia y amor pa prohimo . E concepto di “bon comun” no ta uno nobo, pero den un tempo di decadencia y desesperacion e ta un pensamento cu ta duna speransa.
Pastor Calix Ashby den un refleccion eloquente a mustra con “bon comun” por sirbi como un compas moral den nos bida y den nos trabou den comunidad, manera ela sirbi den pasado. Un bon compas ta guia Bo den tur situacion. Citanto varios texto biblico Pastor Calix Ashby a subraya e responsabilidad comun cu nos tin di cuida un pa otro, y duna contenido na e bon comun den nos relacion cu nos famia, amistad y bisiña.
Docente constitucional di Universidad di Aruba, sr. Luciano Milliard a duna un disertacion sumamente interesante riba “Bon Comun y e derecho riba enseñansa”. Obviamente un area sumamente importante pa bida diario den nos comunidad. Enseñansa ta mas cu formacion intelectual, pero ta oportunidad pa un persona alcansa su deseonan di mas profundo. Enseñansa no obstante cu mester ta accesibel, e mester forma un comunidad y capacita un comunidad pa asina garantisa un desaroyo continuo y un futuro prometedor pa Aruba.
Un di e oradornan hoben tabata e studiante di didos aña di Harvard University, Mimi Koenig. E a papia di “Common Good one act at a time. Moving young generation from an “I” to a “We” society”. Esaki ta un tema cu ta interesa hobennan en particular pa motibo di e aparente falta di interes di hobennan den asuntonan general di comunidad. E generacion nobo ta wordo kwalifica como e generacion indiferente pa locual ta pasa nan alrededor, y no ta realisa nan potencial pa contribui na un mehor comunidad. E concepto di E Bon Comun lo inspira e generacion nobo, pa participa activamente den e procesonan di cambio y mehoracion di nos Pais.
E hoben empresario y Business Management Professional na Aruba, Marlandi Gracia a splica con e ta aplica e pensamento di “bon comun” den e empresa di su famia, mustrando cu por aplica esakinan den economia tambe. Economia mester produci fruta pa tur cu ta biba na Aruba. E mensahe importante cu a wordo comunica pa Marlandi Gracia ta cu e mundo empresarial mester realisa cu nan tin un responsabilidad social pa contribui na crea un mehor comunidad. E mentalidad di explota empleadonan simplemente pa genera mas ganashi no ta cuadro cu e concepto di BON COMUN, ta momento pa inverti den mehor ambiente y condicional laboral pa nos empleadonan,
E conocido domi Peter Hazenoot a elabora den forma bunita riba e “Bon Comun, Comunidad, Solidaridad y Responsabilidad”. Esaki a ilustra e responsabilidad cu nos tur tin pa loke ta pasa den nos comunidad.
Ex-Prome Minister di Aruba y lider di partido AVP, mr. Mike Eman a papia riba “Bon Comun, e Causa Comun y politica di Speransa”. Den un forma original ela ilustra cu ehempelnan concreto cu e pensamento di “bon comun” no ta un utopia, algo bunita cu lo no ta alcansabel. E ehempel cu mas a atrae atencion ta di Etty Toppenberg cu a usa su talentonan musical y di canto pa entretene hende pa añanan largo sin busca fama of reconocemento personal. E interes di comunidad ta loke a inspir’e. Locual a keda resona den e mente y curason despues di e discurso di Ex-Prome Minister di Aruba y actual lider di partido AVP ta e echo cu nos tin e hendenan y e capacidad pa nos realisa e BON COMUN pa nos Pais. Mr. Mike Eman a reconoce mas persona den e sala cu a mustra di tin e Bon Comun na pecho, manera famia John Fung, e hoben entrepreneur Terrance Ras, e pareha Anthony Geerman, trahadornan incansabel pa bunitesa y limpiesa di Aruba, Jerry Schwengle cu a companja Rolly Bislick riba su hazanja pa realisa un Piscina Olympico pa Aruba, Josephin Albertus, sindicalidsta luchador cu curashi, a;ma y curpa,
Finalmente Pastor Jairo Maduro a mustra cu e “bon comun” ta en esencia e reconocemento di “dignidad humano”. E ta un forma di traha cu nos por aplica den tur ramo di trabou y bida y ta enrikese bida diario. Un relfecion spiritual a cautiva e atencion di creyente y no creyente presente den e auditorio.
E symposio a mustra cu tin formanan di pensa y traha cu contrario na loke nos ta wak tur dia, ta duna speransa cu nos por biba, traha y crea un comunidad cu ta duna dignidad humano un luga central y cu ta tene cuenta cu tur hende enbez di previlegio pa algun so.
Fundacion Digna Laclé Herera ta contento cu e recepcion di e concepto “bon comun” y e exito di e symposio. E siguiente actividadnan riba e tema importante aki lo wordo anuncia pronto.
