Fraccion di PAR a tuma nota cu ultimo simannan, den diferente interogacionnan cu Ministerio Publico (OM) ora ricibi denuncianan y awor den e caso asina importante manera esun di ENNIA cu OM ta declara cu no tin capacidad di haci investigacion. Den concepto di Fraccion di PAR esaki no por ta un opcion i ta manda un señal incorecto na nos pueblo encuanto e husticia denter di nos pais.
Cu un delito manera un robo den un supermercado of cas si tin capacidad pa investiga, pero den un delito suficientemente grandi lo no tin capacidad pa investiga y tene esunnan cu a comete e acto aki responsabel. Ta un echo cu Minister di Husticia ta ‘Korpsbeheerder’ pues responsabel pa Cuerpo Policial i tur material i capacidad rekeri. Ta Minister su responsabilidad como Minister di Husticia pa si señala falta di capacidad, pa soru pa apunta atravesa di tur e instrumentonan cu ta na su disponibilidad pa esaki wordo eherce.
Fraccion di PAR ta sorprendi sinembargo, cu Minister Hato ta duna di conoce den un matutino di diasabra 9 di september cu falta di capacidad no por ta un motibo pa no bini investigacion, i Minister no ta tuma niun paso pa atende esaki. Investigacion di e caso di ENNIA mester keda haci dor di profesionalnan, siguiendo e procesonan pa por yega na husticia pa tur esunnan perhudica. Haciendo uzo di art. 96 di Reglamento di Ordo, fraccion di PAR tin e siguiente preguntanan pa Minister di husticia:
Minister por confirma na Parlamento cu Minister lo haci uzo di e capacidad den tur su servicionan conforme art. 47 Rijkswet Politie pa asina por yega na e capacidad rekeri pa por enkamina e investigacionnan necesario?
Minister por confirma na Parlamento, cu dado caso den su servicionan e no por yega na e experticio, cu Minister lo haci uzo di e Protocol nobo firma na 2019 (Stc 2019, 38964) caminda Minister lo haci peticion pa capacidad i experticio via RST?
Minister por confirma cu Minister lo haci uzo di art. 13 Rijkswet OM cu ta duna Minister e posibilidad pa duna Instruccion General (Algemene Aanwijzing) na Procurador General pa haci investigacionnan ora ta necesario?