Otmar Oduber di Plataforma Nos Pais ta expresa cu e discusion cu tin na e momentonan aki riba matrimonio di mesun sexo, mescos cu den cualkier otro discusion, manera legalisacion di cannabis recreacional of medicinal, mester tene na cuenta cu nos ta biba den un estado di derecho democratico.
Parlamento su mayoria ta dicidi riba cambionan di ley cu ta tuma luga, problema ta cu e menasanan ta cay den coalicionnan manera cu ‘si no pasa mi ley mi no ta pasa bo ley’. Esaki a pasa den pasado pa loke ta trata e ley di cannabis y ta pasando awe pa loke ta trata e ley di 35 Dollar extra riba e turista.
E ta trece esaki dilanti poniendo enfasis cu e ta un persona religioso, e ta catolico y ta respeta ley di Dios y religion. “Esey no ta kita cu Otmar Oduber no ta respeta y atene su mes na leynan. Un ley cu independiente si bo ta catolico, religioso of no, bo mester respeta y biba segun su espirito. Den e ley ey mester tin espacio pa tur hende por convivi, independiente di nan inclinacion sexual, matrimonio di mesun sexo, esnan cu kier uza cannabis medicinal y tambe recreacional. E ultimo aki na un manera controla y tur mester ta vigente den nos leynan”.
Otmar ta haya sumamente lamentabel cu cada biaha kier trece e polarisacion entre religion y ley. Si religion catolico ta bisa cu no ta kere den matrimonio di mesun sexo, e mester wordo respeta, mescos cu tur otro religion cu tin e pensamento ey. Pero di otro banda tin leynan cu ta rigi pa tur hende y realidad ta cu nos consitucion den articulo 1 ta bisa cu tin cu respeta tur hende nan opinion, independiente di nan sexo, color politico y di unda nan ta bin.
“Eynan ta caminda mi ta kere nos tin cu ta sincera den e discusion unda tin cu bisa cu tin espacio pa tur hende por biba, respeta kico nan preferencia ta y permiti y dunanan espacio den ley pa biba segun nan pensamento y cada un ta respeta e opinion religioso di cada un”, esaki ta pensamento y opinion di Otmar Oduber.
