No tin nada mas doloroso cu mira un yiu falta respet pa su mama, of mira un homber falta respet
verbal y fisicamente pa su esposa of vice versa, pasobra haciendo esey, nan ta faltando respet pa Dios.
Si Dios ta manda nos pa stima nos prohimo, cada biaha cu nos falta nos respet pa nos prohimo nos ta
bay contra e palabra di Dios.
Ora nos ta respeta hende nos ta mustre e amor di Dios cu ta biba den nos.No ta importa ken e persona
ta, no ta importa su color of nacionalidad, e merece nos respet, mescos cu nos kier pa otronan respeta
nos.
E temor di Dios, ta e principio di sabiduria,y e conocemento di Esun Santo ta comprendemento.(
Proverbionan 9:10).
Pasobra Dios no a yama nos pa ta impuro, ma pa hiba un bida santo. Pesey esun cu rechasa esaki,no ta
hende e ta rechasa,sino e Dios cu ta duna su Spirito Santo na boso.( 1 Thesalonisensenan 4:7).
Ta imposibel pa un hende por biba un bida santo, cu un boca yen di palabra sushi, yen di calumnia,
mentira y arogancia pasobra e palabra di Dios ta bisa lo siguiente:
No laga ningun palabra daniño sali for di boso boca, sino solamente palabra cu ta bon pa edificacion,
conforme e necesidad di e momento, pa esaki por duna gracia, na esnan cu ta tende.
Y no haci e Spirito Santo di Dios tristo, pa medio di Kende boso a wordo seya pa e dia di
redencion.Laga tur amargura,furia, rabia,griteria,y calumnia,wordo kita for di boso, hunto cu tur
malisia,Y sea cariñoso cu otro, misericordioso,pordonando otro, mescos cu Dios den Cristo tambe a
pordona nos.( Efesionan 4:29-30).
Falta di pordon y vengansa contra otro nunca por hiba nos na e bida cu Dios kier pa nos biba, pasobra
ora nos no ta pordona nos ta biba den scuridad, mientras cu nos ta wardando e contra partida bin pidi
pordon. Pesey bendiciona ta e persona cu por pordona y laga los y no sigi den cosnan bieuw, pasobra
den e cosnan ey no tin ningun clase di ganashi , tampoco crecemento spiritual.
Ora nos pordona hende, nos ta reconoce cu Dios tambe a pordona nos,pasobra pordon di Dios, ta
cambia curason di hende,e ta cambia nos caminda bieuw pa caminda nobo, e ta haci nos liber y
disponibel pa sirbi Dios.
Como yuinan obedecido, no conforma boso cu e pasionnan cu boso tabtin antes den boso ignorancia,
ma mescos cu Esun Santo cu a yama boso,boso tambe sea santo, den tur boso conducta, Pasobra ta pra
scirbi: Boso lo ta santo, pasobra Ami ta santo.( 1 Pedro 1:14-16).
Laga amor ta sin hipocrecia,Aborece loke ta malo, tene firme na loke ta bon.( Romanos 12:9).
No haci cu hende locual cu bo no kier pa nan haci cu bo, evita di papia malo di hende, evita di ofende
hende sin mester, evita di persigi hende pa motibo di orguyo,y egoismo.
Un mandamento nobo, Mi ta duna boso,pa boso stima otro,y mescos cu Ami a stima boso, pa boso
tambe stima otro, Na esaki tur hende lo sa cu boso ta Mi disipel, si boso tin amor un pa otro.( Juan
13:34-35).
Hesus a yama e multitud serca dj’E y a bisa nan: No ta loke ta bay den boca ta contamina hende, ma
loke ta sali for di boca, esey ta contamina hende.( Mateo 15:10).
Prome cu hende papia laga e pensa prome, pasobra palabra ofensivo, ta herida profundo, pesey nos
mester evita esey.
Laga nos tur respeta otro, den tur momento.
Sinceramente, Pastor Marcel Balootje.