Awe tabata un occasion sin igual na momento cu barco crucero Resilient Lady di linea Virgin Voyages a
yega Aruba pa prome biaha. E barco crucero nobo aki ta pertenece na e flota di Virgin Voyages cu ta
inclui Scarlet Lady y Valiant Lady cu tambe a bishita Aruba pa prome biaha na 2024. E bishita di Resilient
Lady ta marca un simbolo di e presencia creciente di e linea crucero aki den Caribe y Aruba.
Resilient Lady a ser ricibi cu hopi entusiasmo na waf di Aruba, señalando un momento importante den e
esfuerso continuo di Aruba pa fortalece su posicion como un destinacion principal pa crucero. Durante e
ceremonia di intercambio tradicional di plakaat por a conta cu presencia di Andrew Eglin – General
Manager di e barco crucero y Nicolas Sunderland – Capitan. Alabes, por a conta cu presencia di Ronella
Croes – CEO di A.T.A., hunto cu Patrick Melchiors – Manager di Destination Services. Representando e
Autoridad di Waf di Aruba Marc Figaroa – CEO di APA y Mario Arends CCO di APA, hunto cu
respresentantenan di Port Agency Maduro & Sons Mariela Fingal y Griselda Gomez.
E ceremonia aki ta un evento tradicional y simbolico entre un waf/destinacion y un linea di barco crucero
cu ta cumpli cu un bishita special of inaugural cu ta sirbi como un gesto di bon intencion y aprecio mutuo
entre e linia crucero, autoridadnan di waf, autoridadnan di turismo, y otro entidadnan local relevante.
Cu entrega den december di 2022 dor di Fincantieri, Resilient Lady a cuminsa cu su prome bishita formal
den mei 2023 na otro destinacionan. Cu capacidad pa 2,770 pasahero, e barco crucero akí ta contribuí na
fortalece e posicion di Aruba como un di e wafnan principal di crucero den Caribe. Pa 2025, Resilient Lady
lo bolbe bishita Aruba riba e siguiente fechanan: 27 di januari, 3 di februari, 17 di februari, 17 di maart, y 6
di april.
Virgin Voyages ta sigi expande su trayectoria den e region Caribe, caminda cu Aruba ta bira un parti
esencial den su itinerario. E linea crucero a cuminsa bishita Aruba den 2024 cu ruta Sunsets in the Lesser
Antilles y Aruban Sights & Antiguan Nights, dos itinerario cu ta inclui Aruba como un di su destinacionan di
bishita.
