E bishita aki tabata pa haña mas informashon riba desaroyonan ku ta tuma lugá den e kompania aki. Konsehal Coffie tabata di bishita na e instalashonnan na Barcadera, Hato i planta di resiklahe di awa sushi na plantashi Aruba.
Instalashon na Barcadera
E bishita a kuminsá pa 8 or di mainta i nos anfitrion di parti di WEB tabata sra Rosann Jansen. Nos a kuminsá na e instalashonnan na Barcadera, e sitio kaminda Radio Nederland Wereldomroep tabata ubiká anteriormente. Aki sr Ivan Coffie, kende ta e Electricity Production Coordinator, a risibí nos. Sr Coffie a duna un splikashon di e instalashonnan di e parke solar i e pruebanan ku nan ta hasi pa loke ta trata suministro di elektrisidat a base di energia solar. Tambe nos a risibí splikashon di e motornan generador ku tin na e instalashonnan aki. E motornan aki ta suplente i ta aktivá nan ora ta nesesario.
Aparte di e parti di produkshon di koriente nos a risibí un splikashon tambe di e laboratorio di produkshon di alga. Aki nos a haña splikashon di sra Rocca Chin ku ta hasiendo pruebanan ku alga kon ta e mihó manera pa produsí esaki i kua tipo di alga ta mas adekuá pa e tipo di produkshon aki. Tambe nos a haña un splikashon pa kiko por usa alga.
Tambe nos a haña un indikashon di kiko futuro por tin aden, e.o. un sentro di entrenamentu pa nos hóbennan ku ke traha na WEB i un posibel base pa e proyekto di Galileo.
Instalashon na Hato
Despues di Barcadera nos tabata di bishita na planta di WEB na Hato. Aki nos guia tabata sr Hans Starring ku ta Manager BU-Water. Sr Starring a splika nos e proseso di produkshon di awa pa bebe. For di e ‘intake’ na laman te e momentu ku awa pa bebe ta sali for di kranchi. Nos por a tuma nota ku e planta na Hato ta den pleno rekonstrukshon i nos por a komprondé ku pronto WEB ta tuma produkshon di awa bèk for di e kompania di GE. Nos por a mira un impreshon 3D di e instalashon nobo i despues haña un splikashon di e trabounan riba tereno. Tambe nos a haña un splikashon di kiko ta influensia di un eventual waf di kònteiner na e sitio, por ehèmpel ku esaki lo trese algun adaptashon pero ku e lo no stroba desaroyo di WEB na e sitio. Un di e puntonan ku a bin dilanti ta ku e planta nobo mester redusí e energia ku ta nesesario pa produsí awa.
Instalashon nan Plantashi Aruba.
Despues di Hato nos tabata di bishita na Plantashi Aruba kaminda tin e instalashonnan di resiklahe di awa sushi. Aki tambe nos a haña un splikashon for di ora e awa sushi yega e planta te ora ku kaba prosesá esaki. Na BSSS ( Bonaire Seawage & Sanitation System) na promé instante sr Arthur Janga ku ta e Manager BU-Waste Water a guia nos i despues nos a haña guia di Sr. Albert Pieternela. A bin dilanti ku mester a hinka tempu i energia pa koregí i stabilisá e ret pa kolekshon di awa sushi i awor ta kabando ku korekshon i stabilisashon di e ret di entrega di awa resiklá pa e.o. hotèlnan.
Solamente a keda pendiente un bishita na e sentro di monetoreo di SKADA na Amboina, kaminda WEB tin un bista di hinter e ret di koriente aki na Boneiru.
Na tur nos por bisa ku tabata un mainta hopi fruktífero i nos ke gradisí WEB N.V. i sra Rossann Jansen en partikular pa a organisá programa di e dia riba un término hopi korto. Tambe nos ke gradisié pa a regla PPE (ekipo di protekshon personal) pa nos i pa atendé ku e sakamentu di pòtrèt. Un kos ta sigur: nos tin hendenan kapasitá i nos mester sigui sostené i duna oportunidat na nos mes hendenan.
