ORANJESTAD,Aruba
Miembro di directiva di FPNC, sra Andrina Dirks, durante e conferencia di prensa cu a tuma luga diabierna 15 di mei 2020 na Centro kibrahacha a informa comunidad riba e reparticion di grupo di meta entre FPNC y otro instancianan di ayudo, tambe conocí como Amigo di FPNC.
FPNC como unico banco di cuminda oficial na Aruba, ta traha cu mas di 45 otro instancia pa 11 aña caba. E repartición di grupo di meta tin diferente motibonan cardinal, manera: E cliente di un instancia Amigo den hopi caso mester di ayudo mas extenso cu pakete di cuminda y den esey cada instancia tin nan tarea y responsabilidad pa traha na bienester general di su cliente/grupo di meta. Alabes e instancia tin un miho bista riba e urgencia di e peticion y lo por indica esaki na FPNC.
- Pa baha e fluho di registracion directo FPNC ta opta pa sigi laga (un parti di) e ayudo wordo canalisa door di instancianan Amigo di FPNC.
- Hopi cliente mester di ayudo/guia na momento di yena e registracion online pa e ta completo. Registracionnan cu no ta completo lo tuma mas tempo pa FPNC por traha riba nan i e ayudo lo tarda mas. Na e momento aki ta fiha pa saka un pakete den 5 dia di trabao, esaki por bai mas lihe si tur informacion/documentonan ta completo i e por tarda mas den caso cu no ta asina.
Palabracionnan cu instancian den e sector ta lo siguiente:
-Departamento di Asunto Social (DAS) lo atende tur e clientenan cu ta ricibi un otro of entrada di “landsmiddelen” esta fondonan publico p.e. onderstand, FASE, Pensioen- SVB enz. Pues e clientenan aki lo mester acudi na DAS pa asina DAS por haci nan evaluacion y referi e clientenan na FPNC.
-Cliente (potencial/activo) di otro instanciana p.e. FCCA, SVGA, FAVI, WGK (no obstante si e ta haya onderstand, no tin entrada of tin entrada) lo mester acudi na e instancia esaki por haci nan evaluacion y referi e clientenan na FPNC.
– Pa loke ta trata Rode Kruis y e placa cu hulanda a pone disponibel tin combersacionnan andando hunto cu CEDE Aruba y mas organisacionan pa por coordina trabao.
– Cliente residente cu no tin ningún entrada of cu a conoce un caida drastico di entrada por acudi directamente na FPNC via e formulario online riba e website www.fpnc.aw
FPNC ta depende di su instancianan amigo. Tur organización/instancia den e sector di ayudo di pobreza ta mesun importante den e structura total. FPNC ta aplaudi e iniciativanan particular cu a lanta door di e crisis aki y ta yamanan danki pa nan bon trabao riba e tereno di frontliners caritativo y ayudo di alivia pobreza. FPNC ta kere y ta para pa cooperacion cu Amigonan di FPNC pa asina hunto por traha riba diferente aspectonan y cu diferente methodonan den e problematica cu ta basta complica y den cual cada un organisacion tin su tarea den e structura di ayudo existente.
Pa termina FPNC ta gradici tur cu ta traha na bienestar di nos comunidad y ta deseanan forsa y sabiduría den e temporada aki.
Sra. Andrina Dirks- Miembro di directiva FPNC
15 mei 2020
