Durante e apertura di e reunion di Parlatino ku a tuma lugá di 7 pa 9 di mart na Panamá a para ketu na e importansia pa Parlamentonan di Latino Amérika i Karibe asumí nan responsabilidat riba leinan pa regulá uso di Inteligensia Artifisial (“Artificial Intelligence”, AI).
Segun lider di frakshon di partido MAN den parlamento i alabes lider polítiko di partido MAN-PIN, Giselle Mc William a bin dilanti ku ta importante pa optimalisá e uso di e teknologia di AI den kuido, gobernashon i sektor privá, pero semper protehando derechi di privasidat i data, i regulá algoritmo. Di e manera aki ta garantisá étika den uso di AI.
Teknologia tei pa bon i malu, manera un senador di México a trese dilanti unda el a duna ehèmpel pa trese kambio den lei di aviashon Mexicano riba uso di drone.
Edukashon emoshonal
Mc William ta bisa ku e mainta di apertura a kontinuá ku preparashon di e Lei Makro di edukashon emoshonal ku presentashon di sra. Verónica Violant di Universidat di Barcelona. El a elaborá riba e importansia di salú mental pa muchanan ku ta konfrontá ku malesa i a enfoká riba aspektonan manera hospitalisashon i tratamentu kaminda e muchanan mester di sosten emoshonal pa evitá ku despues esaki ta bira un trouma den nan bida.
P’esei sra. Violant ta bisa ku mester envolví e muchanan den henter e proseso di nan malesa dor di pidi nan pèrmit i eduká nan den tur fase di nan malesa, tratamentu i hospitalisashon. Pa logra esaki ta importante pa profeshonalnan den kuido pero tambe mayornan komprondé i adaptá e aserkamentu aki.
Re-enforsando esaki sr. Arnaldo Canales di Fundacion Liderazgo di Chile di su parti a enfoká riba e punto di salida ku un pais por transformá siudadanonan na momento ku inkluí edukashon sosial emoshonal na skolnan i Universidatnan. Hóbennan te ku 13 aña tin potensial pa por forma nan mes emoshonalmente, unda por siña nan atendé ku tristesa, rabia, desepshon, alegria i kontrolá òf mitiga strès.
Canales a presentá un estudio hasí pa Harvard University ku ta mustra resultado di inkluí edukashon emoshonal na skolnan. Ta konkluí ku esaki ta redusí violensia, agresividat di e hóbennan i ta yuda oumentá rendimentu den prestashon na skol.
Banda di esaki tambe a resaltá e importansia pa sostené dosente- i mayornan ku ta eduká hóbennan di awe i futuro pa loke ta formashon emoshonal, unda mayornan tambe mester asistí na lèsnan pa por komprendé i sostené e aserkamentu aki.
Mc William ta di opinion ku region di Latino Amérika i Karibe mester adoptá métodonan lokal/regional di edukashon emoshonal i no esnan Europeo. Aktualmente Chile a trahando ku e metodologia Flinch.
Komprendé salú mental di nos hóbennan ta importante mirando e kantidat di kasonan haltu di suisidio den nos region, pero tambe kasonan di “bullying”. E meta ta pa inkluí edukashon emoshonal na skolnan a base di igualdat i akseso mirando ku hopi biaha famianan no tin e kapasidat pa sostené nan yunan ku edukashon emoshonal pa motibunan sosial i finansiero òf pa motibu ku mayornan no sa mihó.
P’esei na Chile a introdusí e lei di edukashon emoshonal pa skol grupo 1 te na Universidat i asina akapará tur edat pa un formashon emoshonal sosial durante un periodo klave den nan bida.
Embehesimentu
Relashoná ku e tema di embehesimentu a papia riba teknologia pa por asistí e grupo di adultonan mayó den komunidat basá riba data, Mc William ta sigui bisa. Pero un di e problemanan ku Karibe i Latino Amérika ta konfrontá ta ku tin poko data di nos hendenan ku lo por yuda desaroyá teknologia, por ehèmpel AI, den kuido pa adultonan mayó den kuadro di diagnostiká malesanan.
Maneho di grandinan den nos region ku por sirbi komo ehèmpel, ta esun di Cuba ku tin un programa dirigí riba bienestar di grandi ankra den lei (“Codigo de la Familia 20/20”) ku ta enfoká riba salú general, mental pero tambe e parti sosial i di rekreo pa por tin grandinan empoderá i ku ta kosta e pais ménos sèn den gastunan médiko.
Meskos ku ta e kaso na Kòrsou, e malesa neurodegenerativo ku ta afektá adultonan mayó di Cuba mas tantu ta Alzheimer.
E gastunan pa tratamentu i kuido di e pashèntnan aki ta hopi haltu i ta p’esei Cuba bou di Departamento di Siensia, presidí pa presidente di e Komishon di Salú di Parlatino, Dr. Velasquez Perez a kuminsá desaroyá nan propio remedi (meskos ku nan a hasi den COVID 19 unda nan a traha nan propio bakuna) pa kontrarestá efektonan di Alzheimer ku yama Neurocim/NeuroEpo.
E remedi ya kaba ta den fase 3 di tèst ku alrededor di 1400 persona. Esaki ta sosodé huntu ku sientífikonan Kanades di University of Saskatchewan. Den fase 3 ta tèst remedi riba su efektividat i seguridat i te ainda tin bon resultado.
Di e manera aki Cuba di un manera direkto i independiente ta hasi uso di siensia i nan kapasidat pa kontrarestá e gastunan haltu di kuido pa mas ku 125 mil pashènt ku Alzheimer. Un di e puntonan ku ta mara na adulto mayó ta sifranan alarmante di embehesimentu (“vergrijzing”) den nos region i e desafionan pa krea komunidatnan mas yòn.
Pais nan manera Argentina i Uruguay pa kontrarestá e tendensia di embehesimentu aki a implementá sistemanan di sosten finansiero pa famianan pa asina nan por haña mas yu. Na Cuba ta hiba un kampaña di promové fertilidat pa famianan ku ke haña mas yu pero pa kualke motibu no ta logra den esaki. Den kuadro di esaki tambe ta invertí den tratamentunan di IVF pa parehanan ku ke mas yu.
Biblioteka
Pa final di e biahe di trabou na Parlatino e delegashon a bishitá e biblioteka mas bieu di Panama den e zona di Kanal di Panama ku a inougurá na 1914 ora e konstrukshon di kanal a finalisá. E biblioteka ta situá den e edifisio di e skol avansá Merikano (“high school”) di e tempu ei ku yunan di generalnan i trahadónan Merikano tabata asistí.
Tabata den e edifisio aki tambe ku na 1953 e konfrontashon entre studiantenan Merikano i Panameño a inisiá riba un disputa pa Panama por a haña maneho di e kanal manera akordá den un tratado ku Merka, pero ku e Merikanonan a ignorá su ehekushon. E lucha tabata alabes pa de-kolonisá henter e aria rondó di e Kanal di Panama ku e tempu ei tabata dominá pa leinan Merikano, ku Ingles komo idioma ofisial.
Durante e bishita aki nos a haña mira un bunita dokumental di e lucha aki. Ku sosten na 1973 di paisnan Latino Amerikano den “security council” di Nashonnan Uní, e lucha aki a yega su fin na 1977 i Panama na 1999 a rekuperá su kanal kompleto despues di un periodo di maneho konhunto ku Merka. Alabes a de-kolonisá e aria rondó di kanal komo teritorio Merikano.
Den e mesun edifisio aki tambe tin un kolekshon amplio di historia rondó di e konstrukshon di e kanal. Lokual a resultá ta e ròl importante di Afro Karibensenan (prinsipalmente di Barbados) ku a yuda ku man di obra pa por konstruí e proyekto históriko i importante di Kanal di Panama.
Resumiendo Mc William ta bisa: E énfasis durante e seshon di Parlatino riba edukashon emoshonal di nos hóbennan na bienestar di nan desaroyo i desaroyo di pais Kòrsou huntu ku informashonnan riba nesesidat di un maneho integral di grandinan, tabata temanan ku a aportá na mi desaroyo i konosementu personal pa asina asistí mi den mi trabounan komo Parlamentario di Kòrsou. Pero tambe e parti di historia Panameño ku su lucha pa de-kolonisá nan rikesa i kurason di nan ekonomia, tabata hopi edukativo.