ORANJESTAD,Aruba
E titular di e Cartera di Comunicacion, sr. Chris Romero, a reuni cu gerencia di Setar NV y Post Aruba NV, pa asina elabora riba diferente aspecto importante pa ambos compania estatal y yega na diferente conclusion y palabracion.
Gerencia di Post Aruba NV a informa Minister Romero cu nan ta sumamente atento riba e bienestar di su empleadonan y ta pone esaki na prome lugar. Mas cu claro proteccion di nan clientela y henter comunidad tambe ta un prioridad principal. Post Aruba NV, como compania estatal responsabel a tuma y lo sigui aplica tur precaucion indica pa Gobierno di Aruba y Departamento di Salubridad Publico, den e lucha pa contene e plamamento di COVID-19 na nos pais.
Como parti di nan plan di contingencia, Post Aruba NV ta operando cu un ‘skeleton crew’, cual a keda parti den dos ekipo cu no ta bin den contacto fisico cu otro. Oficinanan ta cera pa publico, cu excepcion di servicio di pago di bijstand. Tambe a fortifica medidanan di higiena pa e empleadonan, y a adapta e manera cu ta atende cu trafico di hende durante proceso di pago di bijstand y operacion interno. A pesar di tur inconveniencia operacional cu e medidanan cu mester tuma durante e temporada aki di crisis a trece cun’e, Post Aruba NV ta continua cu entrega di post y paketenan mas lihe cu ta posibel. Cu e yegada di e crisis di COVID-19, Post Aruba NV mester a ahusta y adapta su modelo operacional di un manera repentino. Pero por bisa cu awor caba ta surpasando e reto aki y actualmente Post Aruba NV ta sigui garantisa servicio di entrega.
Di su banda, Setar NV a duna di conoce cu nan ta sumamente satisfecho cu e relacion cu ta mantene cu Post Aruba NV. Maske cu pa consecuencia di e crisis existente Setar NV a manda un cantidad limita di cobransa pa su clientenan haciendo uzo excepcional di un otro compania, e relacion cu Post Aruba NV ta keda uno solido y sumamente valioso y lo mantene su continuidad den futuro.
Setar NV ta consciente y ta promove reglanan di higiena y distanciamento social cu mester aplica durante e pandemia aki. Pa es motibo Setar NV ta promove fuertemente uzo di servicionan digital pa asina evita aglomeracion. Haciendo uzo di servicionan manera MiSetar, Pay.aw via Bill payment y Transferencia di banco, ta contribui na y aplica e indicacionnan cu autoridadnan ta duna pa asina combati COVID-19 mas liher posibel.
E reunion tabata uno hopi fructifero y importante. Minister Romero a keda satisfecho pa mira e proactividad di ambos compania estatal durante e pandemia cu nos ta bibando y ta hopi contento di mira e relacion estrecho cu Setar NV y Post Aruba NV ta mantene.
![Relacion Entre Setar Nv Y Post Aruba Nv Ta Uno Valioso Y Lo Continua Solido Den Futuro 155 Min Tcps Reunion Post Y Setar Apr 2020](https://www.earubianonews.com/wp-content/uploads/2020/04/Min-TCPS-Reunion-Post-Y-Setar-apr-2020-800x533.jpeg)