Tourism Corporation Bonaire (TCB) a duna rekonosementu na dies bishitante na luna di febrüari komo embahador di Boneiru.
Den kategoria di bròns a rekonosé Christine i Jeannine Jennette ku ta bishitando Bonaire pa 11 i 14 aña, Sharon Weber pa 13 aña i Zimra Braizblot pa 14 aña. James i Pat Teeple a haña rekonosementu pa nan di 15 aña di bishita na Boneiru i tambe John Linton ku ta bishitando Boneiru pa 19 aña i kende a risibi feneta di plata.
Na Lynette Lott i Matthew Meyer a otorgá un feneta di oro pa respektivamente 20 aña i 27 aña di bishita na Boneiru.
Joanie Sharrott ta bishitando Boneiru pa 50 aña i por gosa di un trayektoria hopi largu di bishita na Boneiru. “Na aña 1973 mi a bira un sambuyadó sertifiká. Mi promé bishita na Boneiru tabata na luna di yüli 1974 i mi a sambuyá ku Captain Don Stewart qepd i tambe ku Ibo Domacasse qepd i Bruce Bowker qepd. Mi ta kòrda e temporada ei ku Al Catalfumo a habri su sentro di buseo yamá Bonaire Scuba Center, na unda mi a sera konosí ku Eddy Statia i Erwin Muller.” Joanie a partisipá tambe na diferente show di buseo na Merka, manera entre otro e DEMA Show i Beneath the Sea, huntu ku Al Catalfumo i tambe Niki Tromp qepd ku tabata hefe na Ofisina di Turismo e tempu aya.
Na e okashon aki Joanie a risibí e rekonosementu di mas haltu ku ta un feneta di platina. Gezaghèber interino sr. Nolly Oleana tambe tabata presente durante e rekonosementu aki i huntu ku Helen Mercera a hasi entrega di e plakat korespondiente na Joanie.
