Tourism Corporation Bonaire (TCB) a honra i rekonosé
nuebe bishitante komo embahador di Boneiru na luna di mart den kategoria di bròns, oro
i platino.
Frits i Tilly de Schrijver di Hulanda a keda honrá pa nan di 14 aña di bishita na Boneiru.
“Boneiru ta atraktivo pa nos debí na su klima hopi dushi, i hendenan amabel ku ta duna bo
un kaluroso bon biní unda ku bo bai.” Esaki tabata ekspreshon di Tilly despues di a kaba
risibí rekonosementu pa e mes i pa su esposo ku no por tabata presente na e seremonia.
Na e okashon akí a otorgá nan feneta di bròns.
Den kategoria di oro a duna rekonosementu na Ronald i Jody Wyatt ku ta bishitando
Boneiru pa 20 aña. “Sambuyá den laman kayente, kore rònt e isla selebrando nos
aniversario matrimonial i reuní ku nos amigunan ku tambe ta bishitantenan di Boneiru i
spesialmente ku nos amiga Joan Obispo, ta hasi Boneiru spesial pa nos,” asina nan a
sigurá nos.
Bob i Sandy Taradoina tambe a keda honrá pa 24 aña bishitando Boneiru. Boneiru ta
atraktivo pa e pareha pa motibu di su ekselente sitionan di buseo i hendenan amabel.
Marian i Gerard van Trossel ta bishitando Boneiru pa 28 aña. Marian a risibí e
rekonosementu na nòmber di su esposo tambe ku no por tabata presente. Tabata sra.
Esseline de Palm, un bon amiga di e pareha, ku a sòru pa nan nominashon.
Plakat di platino a keda otorga na sra. Crusita Cicilia, ku na un edat relativamente hóben
a bai residensiá na Hulanda, pero ku tur aña ta bolbe kas. Na e okashon aki a dun’é
rekonosementu pa su di 46 aña ku e ta bishitá Boneiru.
Riba e fecha di su rekonosementu sra. Cicilia a kumpli tambe e bunita edat di 75 aña.
Crusita ta hasi bon promoshon pa Boneiru na Hulanda i hopi biaha ta duna konseho di
biahe pa Boneiru na personanan ku e enkontrá.
Pa TCB, Helen Mercera a ofisialisá e seremonianan di rekonosementu i a hasi entrega di
e sertifikadonan i e fenetanan korespondiente na tur e embahadornan nobo.
