Sekshon di Kultura, Arte i Literatura ta lansa un proyekto den kua a opta pa dokumentá tumbanan di nos tumberonan legendario i di e forma aki duna rekonosementu na nos baluartenan ku a keda den nos felis memoria.
Ta trata aki di un kombinashon di tumbanan ku nos no por lubidá. E pòtpuri aki ta konsistí di seis tumba den un bachi nobo, di kua SKAL a enkargá nos yu di tera, sr. Dwight Leoneta.
Kantantenan ku a interpretá e tumbanan ta nos mes artistanan, manera Chendell Beaumont, Rolindo Dortalina, Dayron Coffie, Marianne Offerman, Jairo Evertsz i Robertico Balentin. E artistanan a interpretá tres tumba di sr. Antonio Trinidad, unu di sra. Carmen Goeloe, unu di sr. Papari Thielman i unu di sr. Glenn Lugo. Tur e tumbanan den pasado a kue título di Rei di Tumba.
Musikonan ku a forma parti di e proyekto ta:
Roddrick Strongolo Booy – Timbal
Jean Paul Tirso Coffie – Conga & Wiri
Joel Angel – Kampana
Dennys Zavala – Trompet & Trombone
Coni Colina – Baritone Sax
Koro- Jairo Evertsz, Chendell Beaumont, Benoni Balentien, Dwight Leoneta
Dwight Leoneta- Areglista, Teklados, Bass, Mixing
Ku e bunita proyekto aki, Sekshon di Kultura, Arte i Literatura SKAL ku honor ta rindi homenahe na sr. Patricio Thomas, Maestro di Maestronan di Seremonia.
Na momentu ku lansa e tumba, SKAL lo sòru pa un kopia pa famia i esnan interesá. Pa mas informashon por tuma kontakto ku nos kolega sr. Robert Sances na telefòn 717 5330 ekstenshon 3615 òf na e-mail: robert.sances@bonairegov.com.
Ku e primisia aki, SKAL ta ta duna su aporte pa mantené nos kultura bibu.
