Directora di biblioteca, sra. Astrid Britten, a haya bishita ayera di 3 cabayero, Garrelt Verhoeven y Carl Haarnack y Kurt De Belder for di Hulanda. E cabayeronan tambe a bishita Dept. Arubianan/Caribiana y a keda impresiona cu e coleccion Caribiana y e coleccion cu material antiguo. Nan a reuni cu Zetsia Ponson y Peter Scholing aserca y tambe 2 colega di Archivo Nacional Aruba cu un posibel colaboracion riba tereno di digitalisacion como topico. Pa Archivo Nacional Aruba tabata tey Raymond Hernandez y Edric Croes (Partners den plataforma Coleccion Aruba).
Carl Haarnack y Garrelt Verhoeven ta riba un book tour na Surnam, Aruba y Corsou pa presenta e publicacion ‘Reis naar Surname’ y nan ta acompaña pa e bibliotecario di Universidad na Leiden, Kurt De Belder. Nan a entrega un publicacion na sra. Britten cu e titulo ‘Reis naar Suriname’. Esaki ta edicion adapta basa riba e publicacion original na Frances di escritor y artista P.J. Benoit (1782-1854) ‘Voyage à Surinam’, relato di un viahe. Diferente profesional a traha riba e publicacion aki, por menciona Ger Leppers (traduccion) y Ellen Ombre (prologo).
Haarnack y Verhoeven ta presenta den nan introduccion informacion nobo y remarcabel cu ta pone un otro lus riba e nificacion di e buki pa loke ta trata e bista riba historia di sclavitud na Surnam. E buki ta wordo considera un di e fuentenan clasico di historia di Surnam y ta rico na imahennan historico di sclavitud, paisahe di Surnam, flora y fauna, bida diario na Surnam 2 siglo pasa, fiesta y ritual, tur basa riba dibuhonan di Pierre Jacques Benoit.