Reino Hulandes ta trahando riba un consensus bescherming persoonsgegevens pa proteccion di informacion priva di hende. Parlamentario independiente Ryçond Santos do Nascimento ta duna di conoce cu tin hopi papiamento rond di e topico aki y tambe tin hopi malcomprendemento rond di e ley aki.
Sinembargo Parlamentario independiente Ryçond Santos do Nascimento ta kere cu ta importante pa compronde cu na e momentonan aki nos leynan y nos reglanan pa locual ta privacidad nan no ta bon y nan no ta suficiente y ta bao di nivel di locual cu e mester ta, esaki ta e realidad cu ta bibando na Aruba. E situacion ta asina malo cu si autoridadnan ta pidi informacion di un informacion na Europa, Europa no mag di duna informacion di e persona na Aruba debi cu no tin garantia pa e privacidad, no tin garantia cu ta bay cumpli cu full e macro legal di proteccion pa cada ciudadano.
Parlamentario independiente Ryçond Santos do Nascimento ta duna un ehempel den e parti di husticia, unabes cu husticia di Aruba tin mester di informacion di un sospechoso cu ta bibando na Europa of tin informacion di dje na Europa, husticia na Aruba no por haya informacion ey, pakico ? simplemente paso e leynan di Aruba no tin e proteccion nan necesario pa garantisa e privacidad di cada ciudadano incluyendo e privacidad di nos sospechosonan.
Segun Parlamentario independiente Ryçond Santos do Nascimento nos mester corda cu hues ta dicta si ta culpabel of no y hasta un persona condena tin derecho entre otro riba su derecho di privacidad. Kico realmente e ley aki mester haci ? Segun Parlamentario independiente Ryçond Santos do Nascimento, prome e ta bay pone preto riba blanco e exigencianan di porehempel un compania no mester tin mas informacion di e ciudadano di locual ta necesario pa e operacion di e compania of e organisacion.
Algun ehempel por duna manera un dokter tin mester di informacion medico y no tin nada di haci cu otro informacionnan porehempel informacion financiero, pero si ta bay setar porehempel lo tin mester di informacion di adres, unda e servicio mester wordo duna, pero no tin nada di haci cu informacion medico di e persona. Esaki ta significa cu tur compania y organisacion aki na Aruba cu ta haya informacion personal di hende ta trata e informacion cu e ta ricibi na un manera hopi cuidadoso y na prome luga cu e compania y of e organisacion ta tuma solamente informacion cu ta relevante pa cu e operacion di e organisacion.
E di dos parti ta cu e ciudadano mester tin e posibilidad pa wak kico nan ta hinca den nan databank, e ciudadano mester tin e posibilidad di sa kico e compania y of organisacion a pone den nan file pa asina controla si ta berdad si of no. Si dado caso no ta berdad di loke cu tin den e file e ciudadano mester tin e caminda pa cana pa laga corigi locual ta fout den e file.
Segun Parlamentario independiente Ryçond Santos do Nascimento na momento cu e ciudadano no ta haci uzo mas di e servicio di e compania y of e organisacion e ciudadano mester tin e derecho pa e compania y of organisacion kita e nomber y informacion di e ciudadano for di e file.
Esaki ta e marco legal cu mester bin na Aruba cu te na e momentonan aki no tin di e forma aki na Aruba. No tin leynan cu ta exigi companianan y organisacionnan pa bin cu medidanan extra pa garantisa cu e informacion no ta bay lek y na mes momento tampoco un hekker no por yega na e informacion
Click aki bao like y share 👇🏽
1 comment
[…] Source link […]