Ta haci un apelacion pa transparencia completo den e proceso di eleccion y den e maneho di e
resultado na Venezuela
Diadomingo 28 di juli, a tuma luga na Venezuela e Eleccion Presidencial
2024. E pueblo di Venezuela, masalmente a acudi na urnanan electoral pa haci uzo di nan
derecho di voto pa eligi nan presidente.
Na Aruba tambe, tawata tin mas di 1300 ciudadano Venezolano registra pa vota, sinembargo
un poco mas di 500 di e votadonan aki a haci uzo di nan derecho pa vota. Prome Minister
Evelyn Wever-Croes ta gradici tur e votadonan y Consolado di Venezuela na Aruba cu a
organisa y a percura pa tur cos bay bon y trankil. Esaki, manera conoci, no ta e caso na
Venezuela.
Ta di lamenta, Prome Minister a expresa, cu na Venezuela na final di atardi y despues cu e
resultado oficial a drenta, a causa hopi polemica. E comunidad internacional, den esaki Aruba
y Reino Hulandes tambe, tin duda si e resultado cu a wordo publica ta refleha e realidad di e
votacion y ta pidi pa transparencia.
Prome Minister: “E boluntad democratico di e pueblo di Venezuela mester wordo respeta.
Tanto na Aruba como den henter Reino, nos ta preocupa pa e desaroyonan desde diadomingo
anochi despues cu e anuncio oficial di resultado di Eleccion Presidencial a wordo publica.
Reino Hulandes ta uni na comunidad internacional cu ta haci un apelacion pa transparencia
completo den e proceso di eleccion y den e maneho di e resultado. Pa loke ta Aruba, nos ta
preocupa y ta sigui hopi di cerca y cu hopi alerta, e desaroyonan di e ultimo oranan na
Venezuela”.
Aruba tin e frontera cu Venezuela cera caba te cu fin di augustus. E decision aki a wordo tuma
tres luna pasa. Prome Minister a enfatisa cu tanten cu no tin stabilidad na Venezuela, lo bira
mas dificil pa contempla pa habri frontera cu Venezuela bek.
Prome Minister ta pidi pueblo di Aruba completo, pa tene calmo y keda trankil. Aruba ta un
pais cu ta biba di turismo. Nos ta biba di e servicio cu nos ta brinda nos bishitantenan. Na
Aruba nos no por tin e espacio ni pa turbulencia ni pa intrankilidad. E situacion na Venezuela
no ta un situacion nobo. Ya di e prome dia di gobernacion di Gabinete Wever-Croes na 2017,
esaki tawata un problema y ta sigui ta un problema te cu awo.
“Esaki, sinembargo, no ta algo cu nos por soluciona aki na Aruba. Ban mantene calmo y
trankilidad aki na Aruba. Gobierno ta preocupa pa esnan cu ta biba na Venezuela den e
situacion interno actual. Nos lo sigui monitoria y ta keda alerta. Y mi ta pidi pa nos tur uni den
oracion pa pronto bin un solucion na Venezuela”, Prome Minister a expresa.
