Hende di 60 aña bai ariba ta na bùrt awor aki pa registrá pa e angua kontra corona. Ta pidi hende di 18 pa 60 aña pa no registrá nan mes awor aki, nan no ta na bùrt na e momentu aki ainda. ‘Masha hopi hende ku ke registrá nan mes a yama callcenter e último dianan. Hendenan mester a yama masha hopi biaha promé ku nan haña un empleado na liña. Nos sa awor ku tin hende di 18 pa 60 aña tambe ku ta registrá nan mes, miéntras nan no ta na bùrt ainda. Nos konseho ta pa no yama awor aki pa un bakunashon, miéntras ku mirando bo edat bo no ta na bùrt ainda,’ asina kordinadó Joey van Slobbe di Salubridat Públiko a duna di konosé.
Van Slobbe ta rekonosé ku callcenter i www.bonairecrisis.com ta konfrontando sierto problemanan inisial na momentu di registrashon di hende ku mèldu nan mes pa e bakuna kontra corona. ‘E último dianan e liñanan tabata basta okupá, p’esei nos ta habri liña nobo. Pa loke ta trata registrashon online nos a mira ku tin ora e sistema ta duna hende un sita riba un dia ku no tin bakunashon. Esei nos ta koregí ainda.’
Hende ku no tin un adrès di e-mail ainda, por usa e-mail di un famia òf konosí pa konfirmashon di nan sita ora nan registrá via telefòn òf online. Pero si e famia òf konosí mes ke registrá despues, e persona tin ku duna un otro adrès di e-mail. Si e no hasi esaki, no por finalisá e registrashon pasobra ya a usa e adrès di e-mail un biaha kaba.
A sosodé ku hende bou di 60 aña a registrá nan mes i haña un sita. ‘Esei por pasa pasobra no tur ora e sistema ta ripará ku un hende ta riba 60 aña. Si un hende menshoná un sédula ora di registrá, su edat ta konosí. Pero den kaso di un hende ku menshoná un number di pasport, e sistema no por detektá kiko su edat ta. E hendenan di ménos ku 60 aña ku bini un sita aworó, no por pasa angua e dia ei. Den e fase akí mester bakuná hende di 60 aña bai ariba.’
Boneiru ta haña sufisiente bakuna di Hulanda pa laga bakuná tur hende ku skohe pa hasi esaki, asina Van Slobbe a bisa. ‘Hendenan por ta trankil ku ora nan ta na bùrt, di bèrdat nan ta haña bakunashon tambe. Tin motibu médiko pa laga e grupo di hende di 60 aña bai ariba ta e proménan pa pasa e angua kontra corona. P’esei laga nos duna nos hendenan di 60 aña bai ariba preferensia.’
