ORANJESTAD,Aruba
E prome Ciclo di 100 Innovations tabata un exito completo durante su trayectoria den April. Nos a ricibi mas cu 80 proyecto di teamnan cu ta desea pa nan proyecto wordo desaroya cu ayudo di 100 Innovations, cual mas cu 30 proyecto ta na caminda pa word haci un realidad. Den e simannan venidero, e teamnan lo haña e oportunidad pa haya seminario riba diferente topiconan, tur cual lo yuda desaroya nan proyectonan den diferente forma y tambe produci resultadonan positivo pa tanto e lidernan di proyecto y nos isla, Aruba.
Registracion pa e segundo Ciclo ya caba ta den su di dos siman di ehecucion. Te cu dia 30 di juni, tur idea den e area di People, Planet y Prosperity ta keda bon bini.
Tur idea den e area di People ta encera ideanan cu lo asisti na resolve e retonan cu nos ta enfrenta cu tin un efecto riba e hendenan den nos comunidad, of e hendenan cu ta bin den contacto cu nos comunidad. E area di Planet ta inclui tur idea cu por asisti cu e retonan cu ta afecta nos medioambiente, ambos riba tera y marino. E area di prosperity ta inclui tur idea cu tin un impacto positivo den desaroyo di nos economia.
Nos ta hopi entusiasma pa mira e creatividad cu nos comunidad ta inventa pa mehora nos isla. Nos a wak e creatividad aki pa Ciclo 1 y nos ta spera mas ideanan na caminda pa Ciclo 2. Nos ta enfrenta hopi retonan awo como un isla, door di COVID-19, pero niun reto ta mucho grandi pa nos isla; p’sey nos ta hopi sigur den e innovacion di nos comunidad.
E proyecto aki ta un invitacion pa tur hende cu tin solucionnan innovativo y creativo pa cualkier reto cu nos ta enfrentando, niun idea ta mucho chikito of mucho grandi! Si bo tin un idea cu den cualkier manera por asisti na nos comunidad y isla, e programa aki ta p’abo! Crea awe, pa mañan nos por ta orguyoso di nos isla y pa e aña nan pa bin.
No lubida di bishita nos website, www.100innovations.org pa mas informacion, of si bo tin mester di inspiracion pa planea bo proyecto innovativo y mas cu claro, registra bo idea! Sigui nos riba nos paginanan social @OneHundredAruba pa keda informa di tur e desaroyonan di 100 Innovations!