(INFOBEA) Presidente Chines a bishita batallon 78 di e ehercito den medio di tension cu Taiwan den e Indo- Pacifico. Den un declaracion cu a lanta alarma atrobe na occidente, Xi Jinping a haci un yamada na e militar di China pa mehora e preparacion di combate di e tropanan.
Xi, tambe secretario general di e Comite Central di e Partido Comunista Chines y presidente di e Comision Militar Central, a haci e declaracionnan aki ora cu el a inspecciona batallon 78 di e militarnan.
Den su declaracion, el a pidi pa haci esfuerso pa mehora e nivel di preparacion pa combatimento, reforsa e entrenamento di e personanan clave y crea capacidadnan nobo di combatimento.
El a subliña tambe ‘e importancia di fortalece e construccion di e partido, mantene un nivel halto di integridad y unidad di e forsanan arm y garantisa cu e armada ta keda estable y sigur’.
Zhang Youxia y otro comandante militarnan halto tabata presente durante e inspeccion.
E exigencianan di mas preparacion ta alarmante pa e aumento di tension den e Indo-Pacífico. Ta cu e regimen di Xi Jinping a demostra durante lunanan cu nan kier tuma control di Taiwan, un isla auto- gobernado cu – nan ta bisa – ta parti di nan teritorio. Cu tempo e expresionnan di deseonan aki a bira mas fuerte y mas frecuente.
Alarma pa expansion militar Chines ta grandi. E aña aki, e regimen Chines a anuncia e aumentonan mas grandi den su presupuesto militar for di aña 2019. E plannan di modernisacion mester ta cla pa 2035 y cu e meta pa transforma e militar den un forsa di ‘categoria mundial’ cu lo rivalisa cu esun di Merca y otro potencianan occidental pa 2050.
Te cu awor, e People’s Liberation Army (PLA) ta conta cu mas di dos miyon homber y muhe entrenando den servicio activo, segun e Instituto Internacional di Estudio Strategico (IISS), cu sede na London, loke ta haci’e e forsa armado mas grandi di mundo.
E trupanan di tera ta forma e parti mas grandi di e ehercito, ku 965.000 soldanan, mientras cu e marina tin 260.000 miembro i e forsa aereo 395.000. Ademas tin un forsa di misil strategico di 120.000 y un brasa paramilitar di 500.000 solda.
E cambionan ta bin di man di mas concentracion di poder: Xi Jinping a reforsa su control riba e militar desde cu el a aboli e limitenan di mandato na 2018, permitiendo pa e keda den poder indefinidamente.
Na 2021, e Ley di Defensa Nacional a ser amenda pa duna e Comision Militar Central (CMC) dirigi pa Xi e responsabilidad completo pa e mobilidad di defensa. Esaki ta nifica cu e Conseho di Estado no tin ni palabra ni voto mas den e decisionnan relaciona cu e empleamento militar.
China tambe tin un arsenal grandi di misil, hunto cu avionnan furtivo y bomberonan capaz di transporta arma nuclear, como tambe submarino.
Peking tin mas o menos 350 arma nuclear, hopi menos cu e 5.428 cu Merca tin of e 5.977 cu Rusia tin, segun data di e Instituto Internacional di Estocolmo pa Investigacion pa Paz (SIPRI).
E arsenal nuclear Chines ta spera di aumenta te na mas o menos 1.500 warhead pa 2035, segun e Pentagon a declara aña pasa.
1 comment
[…] Source link […]