Regata di Boneiru 2024 a finalisá ku vários kareda den
diferente kategoria, ku partisipante for di nos área karibense i pafó di esaki. E evento
anual, ku a tuma lugá for di 6 te ku 12 di òktober 2024, a laga nos mira koredó di boto di
tur edat i nivel den múltiple klase, ku tabata varia di Optimist i Sunfish te Yate, Boto di
Piskadó, Kitesurf, Wingfoil i Windsurf, loke a hasi esaki un Regata inolvidabel.
Boto di Piskadó den Regata 2024
Un di e kategorianan di mas spesial den Regata di e aña akí tabata esun di Boto di
Piskadó. Nos botonan di piskadó tin un tradishon ku rais hopi profundo den Regata di
Boneiru, pasobra ta ku nan e evento mes a kuminsá na aña 1968. Sinembargo, durante e
último añanan partisipashon di e botonan di piskadó ikóniko akí a bira ménos, pa motibu
ku hopi di nan a kai den deterioro.
E aña akí Tourism Corporation Bonaire a traha huntu ku Kooyman pa logra haña e
botonan di piskadó bèk den Regata. Kooyman generosamente a spònser Regata i a
kontribuí na restorashon di diferente boto di piskadó, di manera ku nan por a partisipá na
e karedanan. E espektativa ta ku e esfuerso akí lo mantené presensia di nos botonan di
piskadó den e Regatanan di futuro.
Den kategoria di Boto di Piskadó pa Regata 2024, Giovanni Soliano a sali na promé lugá
ku su boto Arantsa. Giovanni a regresá Boneiru for di Merka pa duna honor na su tata i su
ruman, kendenan resientemente a fayesé. Un danki di kurason ta bai pa Kooyman pa nan
kontribushon di balor inkalkulabel na rekuperashon di e tradishon stimá akí den Regata.
Dediká na sr Henry Toré
Regata di e aña akí tabata dediká na sr Henry Toré, un Miembro Vitalisio di Bonaire Lions
Club i un figura sentral den historia di nos Regata. Sr Toré a hunga un ròl importante na
momentu ku a kuminsá ku Festival di Regata na aña 1983, di manera ku e evento no tabata
konsistí mas di solamente di kareda di boto durante dia, pero tambe di un selebrashon di
músika, kultura i tradishon den oranan di anochi. E evento di e aña akí a rekonosé i honra
su kontribushon i dedikashon di hopi aña largu na enseñansa i desaroyo kultural na
Boneiru.
Regatta Village i entretenamentu
Regatta Village a forma e kurason di e selebrashon i for di 9 te ku 12 di òktober tur anochi
a brinda entretenamentu. Tabatin presentashon di artistanan lokal i internashonal, entre
otro DJ Osocity, Frenna, Semii Marten, Luis Moka, BB Bad, ICONS, Jeon, Ir Sais, DJ Krokz,
Tsean, Chris Strickz, Haitian Compa Band, Steel Band, JC & Friends i mas. Den Regatta
Village tabatin tambe stènt di kuminda, eksposishon di arte, un huki spesial pa mucha i
aktividatnan kultural, di manera ku el a bira un sentro di eksitashon pa tantu nos
habitantenan lokal komo nos bishitantenan.
Puntonan kulminante mas importante di e kompetensianan di Regata, mas di 120
partisipante
• Klase Optimist:
o Optimist A: Giraldo Timmers di Kòrsou a sali na promé lugá ku un skor nèto di 11
punto.
o Optimist B: Ariana Riley a dominá ku un skor final di 15 punto.
• Klase Sunfish:
o Sipke Stapert di Boneiru a sali viktorioso den kategoria di Sunfish. El a gana tur
kareda i a finalisá ku 7 punto.
• Yate – Racing Division:
o Racing 1: Jenk a gana ku 6 punto, siguí pa Enrique Gasco ku 12 punto.
o Racing 2: Dick Langerveld a sigurá su mes di e viktoria ku un skor total di 6 punto.
• Micro Boat:
o E kapitannan Melissa Domacasse i Genaro Anthony a duna prestashonnan
ekselente den diferente kategoria.
• Kitesurf i Wingfoil:
o Kitesurf Twintip Maskulino: Leon van Bergen tabata lider den kategoria
maskulino, miéntras ku Astrid van Schaik a sali na promé lugá den divishon di
hende muhé
o Wingfoil: Rick van der Leer i Monique Meijer a keda koroná komo kampion den
kompetensia di wingfoil pa hende hòmber i hende muhé.
• Windsurf:
o Juviannie Augustien a konkistá e título den kompetensia di windsurf i el a mustra
su abilidatnan eksepshonal riba laman.
Eventonan adishonal
E siman di Regata tabata yen di aktividat aparte di e karedanan di boto. Puntonan
kulminante tabata entre otro e evento di Bonaire by Night dia 5 di òktober, kaminda
bishitantenan por a disfruta di un anochi hasiendo kompra i di e ambiente di fiesta den
Kaya Grandi na Playa. Otro eventonan eksitante tabata Keinta kaya, Swim to Klein
Bonaire, Regata su Parada di Bandera, Parada di Mucha, Limpiesa despues di Regata,
Torneo di Dominó di Curoil, Siman di Sòftbòl, Caribbean Rockets Rides, Kareda di Regata
Loop i e Regatta Boat & Float Party.
Spònsernan i partnernan
Regata di Boneiru 2024 a bira posibel pa medio di e kontribushonnan generoso di su
spònsernan i su partnernan. Guardian Group, komo spònser prinsipal di Regata 2024, a
duna un sosten krusial pa hasi e evento di e aña akí un éksito. Rekonosementu spesial ta
bai tambe pa Entidat Públiko Boneiru pa su ròl komo e partner no-komersial di mas
importante. Otro spònsernan importante tabata: Tourism Corporation Bonaire, Curoil,
Fundashon Wega di Number Boneiru, Corendon, Van Der Valk Plaza Beach & Dive Resort,
Kooyman, Telbo, BWM, BOG, BIA, Penha, Amstel Bright, MCB Bonaire, Don Andres, Grand
Windsock, Stinapa, Captain Don’s Habitat Bonaire, Obersi Group, Web Bonaire, Total
Services Bonaire, C3, Selibon, Hi Rentals, Fire Safety, Bonhata, Massive, Hype, Cuba
Compagnie, Stone Crusher i Enterprise Rent-A-Car.
E spònsernan akí, huntu ku hopi otro, a hunga un ròl krusial pa sigurá ku nos Regata a bira
un éksito.
Un biaha mas Regata di Boneiru 2024 a mustra ku nos isla ta komprometé su mes pa
konservashon di tradishonnan marítimo i na mes momentu pa promové un espíritu di
kompetensia i komunidat. Gustosamente Tourism Corporation Bonaire ke ekspresá su
sinsero gratitut na tur e empleadonan, habitantenan lokal i bishitantenan ku a hasi
Regata di Boneiru 2024 un evento eksitoso i memorabel.
