Tourism Corporation Bonaire (TCB) ta orguyoso
di por anunsiá ku Regata di Boneiru 2024 ta dediká na sr Henry Toré, un Miembro
Vitalisio di Bonaire Lions Club i un figura importante den historia i desaroyo di e
evento.
Regata di Boneiru, ku a tuma lugá pa promé biaha dia 8 di sèptèmber 1968, a
kuminsá komo un kompetensia chikitu rònt di Klein Bonaire. Inisialmente e evento
tabata konsekuensia di un yamamentu di otro afó den un forma amistoso entre
Hubert 'Ibo' Domacassé i Donald 'Captain Don' Stewart, ku a pusta ku nan botonan
di bela Sislin i Veila pa mira kua di nan dos ta yega waf bèk promé.
E aña ei, Larry Thielgard, ku e tempu ei tabata presidente di Bonaire Lions Club
(BLC) i amigu di Captain Don Stewart, a mira e entusiasmo i e popularidat ku e
evento a okashoná. Ku esaki den mente, BLC a tuma e inisiativa pa organisá e
kareda di boto di bela na un manera mas strukturá.
E siguiente aña a inkluí e evento ofisialmente den agénda di gobièrnu di Boneiru, ku
komo promé notifikashon '26 di òktober – Kompetensia di boto di bela organisá pa
Lions Club Bonaire'. Rápidamente Regata su popularidat a krese i el a bira muchu
grandi pa BLC so atendé kuné. Na aña 1971 Ofisina di Turismo a tuma
organisashon di e aktividatnan riba laman durante dia over.
Hasta despues ku a traspasá organisashon di Regata pa Ofisina di Turismo, Bonaire
Lions Club a keda hunga un ròl dunando sosten i ayudo kaminda esaki tabata
nesesario. Miéntras ku e kompetensianan durante dia tabata floresé, BLC a ripará
ku parti anochi tabatin muchu tiki aktividat pa bishitante. Parti anochi tabata ketu na
nos isla, loke pa Lions Club tabata un motibu pa buska solushon.
Na aña 1983, despues di 16 aña di enbolbimentu, Bonaire Lions Club, bou di
presidensia di sr Henry Toré, a introdusí Festival di Regata. E proyekto akí ku nan a
presentá na e hefe di Ofisina di Turismo, Niki Tromp, a añadí un dimenshon nobo na
e evento pa medio di bini ku festividatnan durante anochi pa komplementá e
kompetensianan di boto di bela durante dia.
"Sr Henry Toré su balor pa nos komunidat ta inkalkulabel, no solamente pa motibu di
su kontribushonnan na Regata, pero tambe pa su dedikashon na enseñansa i
desaroyo kultural na nos isla", segun Miles Mercera, direktor di TCB. "Dediká
Regata di Boneiru 2024 na sr Toré ta un muestra chikitu di nos gratitut pa e herensia
ku el a edifiká. Su vishon i liderazgo a forma e evento akí i hasié e fiesta ku e ta
awendia."
Mirando bèk riba e inisiativa akí, sr Toré den un entrevista resien ku Fuhikubo dia 7
di ougùstùs 2024 a bisa lo siguiente: "Na aña 1983, e aña ku mi tabata presidente, e
úniko aña ku mi a aktua komo presidente, na momentu ku nos a presentá e proyekto
na sr Niki Tromp, e úniko kos ku el a keda sin hasi, ta bula 'riba di alegria ku ta bini
algu mas aserka den e siman di Regata."
Manera ta registrá den archivonan di Fuhikubo, un artíkulo den Edishon di Deporte
di e korant Èxtra di 11 di òktober 1983 a anunsiá lo siguiente: 'Awe e famoso Regata
Internashonal di Boneiru ta ranka sali. E aña akí sigur bishitantenan lo ta
kompletamente satisfecho, pa motibu ku awe nochi Bonaire Lions Club ofisialmente
ta habri Festival di Regata 1983."
E festival a transformá Breedestraat, nos kaya prinsipal (awendia Kaya Grandi), den
un feria vibrante i kolorido. E kaya tabata dòrná ku bandera i lus, di manera ku a
surgi un ambiente festivo, kaminda tantu nos poblashon lokal komo nos
bishitantenan por a gosa di músika di bandanan lokal i presentashon di gruponan
folklóriko. Nada di esaki lo no tabata posibel sin e esfuersonan di sr Henry Toré,
kende awor ta un penshonado despues di un karera eksitoso den enseñansa i
konosí pa su interes profundo den Boneiru su desaroyo sosial, edukativo i kultural.
Segun un artíkulo den Èxtra di 22 di sèptèmber 1983, ku ta wardá den archivonan di
Fuhikubo, "E festival lo dal nos kaya prinsipal Breedestraat (awendia Kaya Grandi)
sera for di ABN Bank te Centro i tambe un parti di Kerkweg (awendia Kaya L.D.
Gerharts) te na Panaderia Exito."
E archivonan di Fuhikubo ta destaká e ambiente tambe ku Papi Antoin a formulá dia
19 di sèptèmber 1983 den Èxtra su Edishon 'Ambiente': "Nan ta dòrna Breedestraat
ku bandera i lus, di manera ku e kaya ta transformá den un feria alegre i kolorido.
Hendenan por balia riba músika di bandanan lokal i tin presentashon di gruponan
folklóriko."
Un di sr Toré su rekuerdonan inolvidabel di Regata ta e último djadumingu di e
evento, na momentu ku e barku militar venezolano T-64 ku a trese hende, boto i
vehíkulo Boneiru, a bandoná nos isla. "A reina un silensio i e djadumingu despues
Boneiru a keda ketu ketu," asina sr Toré ta kòrda den un entrevista ku Fuhikubo dia
7 di ougùstùs 2024.
E ambiente di Regata a haña su kaminda pa kas di sr Toré tambe. Su kasá, sra
Matea Teresa Strickx di Rincon, den felis memoria, un Lioness, huntu ku otro
damanan tabata responsabel pa kushiná sòpi pa e stènt di BLC durante e festival. E
sèn ku nan tabata rekoudá, BLC tabata invertí di nobo den komunidat boneriano. E
tres yunan di famia Toré tambe tin bon rekuerdo di nan hubentut komo parti di e
Festival di Regata. Na aña 1973 sr Toré a bira miembro di BLC. Despues el a bira
presidente, presidente di zona i Miembro Vitalisio.
Sr Toré, kende tin un pashon pa lesamentu i skirbimentu, a skirbi sinku buki na
hulandes, entre otro Een tropische kruisiging, De ontspoorde Benjamin, Tranen over
Matravagera, Broos Geluk en De Eed. El a skirbi poesia i obra teatral tambe. Hopi
biaha nan ta deskribí sr Toré komo humilde, kondusí pa balornan di Dios, bon
prepará, inteligente i un hòmber ku ta sumamente enbolbí ku su komunidat.
Biografia di sr Henry Toré:
Henry Toré a nase na Korsou dia 19 di òktober 1940 den e bario di Saliña. Despues
di a hasi su estudio pa maestro di skol na Radulphus College na aña 1960 sr Toré
por a yama su mes maestro di skol. Despues sr Toré a obtené e ‘akte van
Bekwaamheid als Hoofdonderwijzer’ (hoofdakte) i oportunidat a habri pa e por a bira
kabes di skol. Den e añanan despues Henry Toré a obtené akte L.O. Engels i L.O.
wiskunde.
“Na aña 1964 mi a muda for di Korsou pa Boneiru, pa yuda pa algun aña, pasobra e
tempu ei, masha tiki maestro tabata dispuesto pa bin biba na Boneiru.”
E algun aña a bira ku awe te ainda Henry Toré ta yama Boneiru su kas despues di
60 aña.
“Na aña 1970 mi a ser nombrá kabes di Lourdes Mulo, na unda ku promé ku mi a
bira direktor mi tabata dosente. Lourdes Mulo despues a bira Scholengemeenschap
Bonaire.”
“Siguientemente Ministerio di Enseñansa a aserká mi pa bira Inspektor di
Enseñansa Avansá na Boneiru i Korsou (1980)”. Na 1981 Toré a kuminsá un estudio
di lei na UNA.
“Despues di a ehersé e funshon di Inspektor di Enseñansa Avansá na Boneiru i
Kòrsou pa algun aña, Gobièrnu Sentral a lanta un Departamentu di Enseñansa,
sekshon Boneiru, kaminda a nombra mi komo hefe. E trabou aki mi a ehersé te na
mi penshun na aña 1995.”
Durante su añanan na Boneiru sr Toré a dediká hopi di su tempu liber na desaroyo
sosial di e isla. E tabata lider di Jonge Wacht i despues, huntu ku otro personanan,
el a stimulá trahamentu di sentro di bario na Boneiru. Sr Toré a yuda lanta FESBO
(Federashon di Sentronan di Bario Boneiru) i a fungi komo miembro di direktiva i
presidente. Na aña 2002 tur bario na Boneiru tabatin nan sentro di bario. Sr Toré
tabata tambe ko-fundadó di R.K Schoolbestuur i miembro di direktiva di Stichting
Ziekenverpleging en Bejaardenzorg Bonaire (awor Fundashon Mariadal). Otro
funshonnan ku el a okupá tabata sekretario di Onderwijzersvereniging Don Bosco,
koresponsal pa korant Amigoe, sekshon Boneiru, ko-fundadó di Schietvereniging
‘Tirabon’, miembro di direktiva di Fundashon Wega di Number Boneiru, miembro di
direktiva di Federatie Antilliaanse Jeugdzorg (FAJ) i presidente di Union di
Penshonado pa Adelanto i Hustisia (UPAH) sekshon Boneiru.
Huntu ku otronan sr Toré a para na kuna di Ars Cantandi, un koro mixto ku durante
30 aña a marka pouta na Boneiru, espesialmente nan konsiertonan den temporada
di Pasku. Riba petishon di gobiernu di Boneiru a lanta FORMA (Fundashon
Formashon pa Mañan) ku a kaba di selebrá 30 aña di eksistensia.
Durante e añanan 1987 pa 2002 sr Toré a okupá tambe e siguiente funshonnan
públiko: Hues suplente na korte di promé instansia na Boneiru, gezaghèber suplente
di Boneiru i Sekretario di Estado den Gobièrnu Sentral den temporada di Antia
Hulandes. Na aña 1994 Henry Toré a risibí un kondekorashon real komo Officier in
de Orde van Oranje Nassau.
Henry Toré tin un pashon pa lesamentu i skirbimentu. Na tur el a skirbi sinku buki na
Hulandes: Een tropische kruisiging (1997), De ontspoorde Benjamin (1999), Tranen
over Matravagera (2003), Broos Geluk (2010) i De Eed (2020). Tambe el a skirbi
poesia i obra di teatro.
Aktualmente na un edat respetá sr Toré ta disfrutá di un bida trankil, den kompania
di su yunan, ñetunan i bisañetu i sobrá famianan na Korsou i Boneiru, sin lubidá tur
su amistatnan.
Gustosamente Tourism Corporation Bonaire ke ekspresá su gratitut na Fuhikubo pa
a duna tur e informashon balioso tokante e kontribushonnan di sr Henry Toré. Nos ta
invitá tur hende pa duna honor na sr Henry Toré durante Regata di Boneiru 2024, pa
selebrá su herensia i e patrimonio kultural riku di Boneiru.
