ORANJESTAD,Aruba
Den un conferencia di prensa, Refineria di Aruba a aclarea algun punto importante y a amplia riba e topico di terminacion di e contract cu Citgo.
Sr. Richard Eman, Presidente di Hunta di Supervision di RDA a aclarea diferente punto en general. Ela cuminsa cu menciona e fecha 10 di juni, 2016. Fecha riba cual Gobierno di Aruba mediante Sr. Mike Eman y Sr. Mike De Meza a firma acuerdonan cu Sr. Nelson Martinez pa Citgo Aruba Holding y Citgo Aruba Refinery. Cu esaki Citgo a haya tur e instalacion nan pa nan por traha cu ne. Sinembargo den tur e tempo ey nan no a haci nada cu e refineria ni e tankinan.
Na comienso di maart 2019, Citgo a aserca RDA y Gobierno pa declara cu nan no por sigui paga mas y tampoco por cumpli cu e apertura programa pa october 2020 pasobra cu nan tin cu stop cu tur cos. Tin sancion nan riba Citgo y no tin fondo mas pa por sigui. Mirando cu for di maart 2019 ya no a paga huur mas a pone nan den default. Y esaki kiermen cu ta aparece e situacion di conflicto. Pa amplia mas riba esaki, den e contract primario “Definitive Participation Agreement” tin un clausula pa ora cu tin un conflicto. Esaki ta e “Umbrella Dispute Settlement Agreement” y esaki ta duna e manera con mester resolve un conflicto. E ta splica: Na momento cu tin un default, RDA mester notifica Citgo di e default. Citgo tin 30 dia pa presenta un plan pa “cura” e default. Si no cumpli cu esaki ta inicia e proceso di resolve e conflicto a traves di “Negotiation – Mediation — Arbitration”. Henter e proceso aki ta uno hopi dificil, largo y costoso cu por dura te hasta 5 aña.
Tambe a amplia riba un otro clausula cu tin y esaki ta e “Force Majeure” (Overmacht). E discripcion di dje ta asina amplio y asina beneficioso pa Citgo cu e chens cu RDA lo gana e caso ta hopi limita. Hasta si gana e caso mes y haya e instalacion nan bek despues di 5 aña nan lo no ta bal nada mas pa motibo di degeneracion y mas ainda ora cu lo mester pidi Citgo pa desmantela nan lo no tin plaka pa haci esaki tampoco. Incluso si bay serca nan compania madre cu ta PDV Holding, tampoco lo por, pasobra cu no por tene Citgo responsabel pa no cumpli pa motibo di e clausula di force majeure, a demas cu nan tin hopi beslag riba nan y tampoco ta dispone di plaka pa motibo di sancionnan. Akinan Sr. Richard Eman a pone enfasis cu apesar di tur esaki RDA no kier pa desmantela.
Den un acuerdo normalmente tin condicion nan cu ta permiti tur dos partido pa gana (WIN-WIN Situation) pero den 2016, ex minister Sr. Mike Eman y ex minster Sr. Mike De Meza hunto cu Sr. Nelson Martinez a firma e contractnan pa bay di acuerdo cu un gran cantidad di condicion nan cu ta haci cu tin un situacion di ganashi pa Citgo, pero nada pa RDA ni Gobierno di Aruba. Esaki ta den un manera hinca den e contract cu no por pone Citgo responsabel pa nada tampoco.
Ora cu Citgo a para tur su actividadnan, RDA a tuma contacto di biaha cu nan y nan prome reunion tawata dia 1 di april 2019. Eynan e mensahe primordial tawata cu no por laga e refineria para eynan asina. Na prome instante Citgo a bisa di kier a suspende e contract of pone “on hold”, pero si haci esaki e refineria lo bay atras y RDA lo no tin entrada. Despues Citgo a cambia pa suspende y entrega e assets bek pa por drechanan y huurnan. Na un prome instante a dicidi di traha un “memorandum of understanding” unda cu tur punto ta wordo documenta y acorda y a base di esey a yega na un draft “Temporary Suspension & Transfer Agreement”.
Algun decision di Citgo e momento ey tawata pa kita tur trahado for di nan trabou cual RDA a lamenta, pero lastimamente no por a haci mucho cu ne pasobra e tawata un relacion laboral entre Citgo y e trahado. Loke si por a haci ta exigi di Citgo pa trata nan trahadonan bon y cu mester duna nan e condicion di “Legal Benefit” cu nan merece y esaki a logra. Di igual manera a pone nan yega na un acuerdo cu nan contratistanan y suppliers. Asina a firma e MOU na october 2019 y a cuminsa negosha pa e “Temporary Suspension & Transfer Agreement”. Problema cu a surgi ta cu den cada reunion Citgo ta bin cu condicion nan nobo cu no ta beneficia ni RDA y ni Gobierno di Aruba. Por ehempel a bin cu e condicion inacceptabel cu ta bisa cu si nos cuminsa un contract cu un otro contratista of operador tur contract ta termina. Asina ey cada condicion nobo tawata bira mas dificil y na fin di 2019 RDA a dicidi cu no por sigui asina y a pasa pa terminacion.
Pa resumi, Sr. Richard Eman ta enfatisa cu e acuerdonan cu Citgo tawata uno hopi malo pa Pais Aruba. Un di nan tawata cu na momento cu a lease e tankinan y e refineria cu Citgo, nan a duna nan tur cos. Tur e tankinan cu Fuels Marketing & Supply Aruba NV (FMSA) tawata uza semper y tambe waf, tur a wordo duna e tempo ey na Citgo. Esey tawata nifica cu ora FMSA importa gasoline, jet fuel, diesel of heavy fuel, FMSA mester a paga Citgo pa e mesun facilidadnan cu RDA a huur cu Citgo. FMSA mester a paga Citgo $0.0338 pa cada gallon cu pasa den nan instalacion. Esaki tawata representa un gasto di +/- Awg. 6 miyon pa aña. Citgo ta paga $10 miyon na lease pa aña y nos mester paga nan bek +/- Awg. 6 miyon bek. Esaki ta algo incomprendibel.
Pa finalisa, Sr. Richard Eman a enfoca riba e direccion cu RDA ta desea di bay.
RDA kier busca un operador pa drecha y opera e terminal y refineria. Esaki tin como concecuencianan manera:
1. E lo crea un cantidad di cupo di trabou pa nos yiunan di tera cu un bon salario.
2. E lo por genera e divisa pa Gobierno di Aruba unda na su turno lo inverti bek den Pais Aruba den por ehempel salud, educacion y infrastructura. Mas importante ta cu Aruba lo por conta cu un entrada stabil, cu ta permiti nos isla su dependencia financiero amplia cu mas pilar economico enbez di solamente turismo.
No por sigui perde tempo cu e tema aki y mester actua lihe prome cu nos refineria sigui deteriora. Mas tarda, menos atractivo e refineria lo bira pa posibel invercionistanan.
