E redukshon di akseins riba gasolin ku 16 sèn ta drenta na vigor na Boneiru dia 8 di aprel 2022. Gobièrnu di Boneiru ta kontentu ku a honrá su petishon pa usa fondonan pa baha kosto di bida na nos isla.
“Esaki ta resultado di e maneho proaktivo di gobièrnu di Boneiru unda ku a aserká gobièrnu Hulandes pa inkluí Boneiru den e plan pa baha oumento di kosto di bida pa asina limitá deterioro den poder di kompra. Un di e área nan spesífiko tabata redukshon di akseins riba kombustibel, ” diputado Thielman a duna di konosé.
Preis di gasolin ta konsistí e.o. di e preis pa bari riba merkado internashonal, gastunan di almasenahe y transportashon. Asina ku e kombustibel yega Boneiru, duana ta kalkulá akseins, ta añadí e márgen nan di negoshi pa e distribuidor, e mayorista y e pòmp di gasolin. E suma di tur e komponentenan aki ta resultá e preis ku nos ta paga na pòmp. E gráfiko ta ilustrá esaki.
For di luna di mart gobièrnu di Boneiru a kuminsá ku e proseso pa aktualisá preis di gasolin na Boneiru segun e sifranan di kompra di CUROIL. “Komo ku Boneiru tin un ekonomia habrí, lamentablemente no por skapa di e efektonan eksterno. E preis di e kombustibel ku ta yega Boneiru ta fluktua ku e preisnan riba merkado internashonal. Mensualmente lo ahustá e preis di kombustibel. E ahuste aki por nifiká un oumento òf un redukshon tur luna,” diputado Thielman a splika. “Den ámbos kaso nos lo sa di trese esaki dilanti den tur transparensia pa e siudadano manera bon gobernashon ta rekerí.”
“Den luna di aprel aki nos lo a eliminá tur atraso den kalkulo di e preis di gasolin a base di e preis riba merkado internashonal. Esaki ta nifiká ku dia 8 di aprel próksimo lo konosé e siguiente ahuste di preis di kombustibel y lo inkluí tambe e redukshon di akseins di 16 sèn manera a ser preskribí pa gobièrnu Hulandes ku fin di mitigá oumento eksesivo di preisnan di kombustibel debí na e situashon mundial ku nos ta bibando aden.”
Kolegio Ehekutivo ta sigui hasi tur esfuerso pa mitigá e efektonan pa ku pèrdida di poder di kompra unda ku por. Segun e publikashon ofishal di ministerio di Finansa di Hulanda, dia 1 di aprel akseins riba gasolin lo konosé un rebaho di 16 sèn pa liter. Lo kompensá e diferensia den preis di gasolin entre 1 te ku 7 di aprel den e lunanan nos dilanti.
