Esaki ta un bon momento pa mira atras den 2023 y wak padilanti den 2024. Loke mas ta resalta den 2023 ta e bloke di MEP y AVP contra supervision di Reino riba nos finanzas publico via un Raft. Paisnan grandi independiente manera Hulanda, Francia, Alemania a acepta supervision financiero di Brussel, anto un isla chikito manera Aruba cu no ta independiente ta nenga tal supervision den nomber di autonomia.
Union Europeo a hasi dos palabracion cardinal pa garantiza e stabilidad di e euro: begrotingsdeficit no por supera e 3% di e Bruto Nationaal Product, y e debe externo di cada pais no por supera e 60% di e BNP. ReD ta di acuerdo cu Hulanda pa hancra begrotingsnormen den e Raft, via un rijkswet, pa asina tin sancion externo ora di no cumpli. Nos ta sugeri pa un economia asina vulnerabel manera di Aruba pa e begrotingsnormen ta mas estricto, esta e begrotingsdeficit no por supera e 1.5% di bo GDP y bo debe externo no por supera e 40% di bo GDP, manera IMF ta recomenda pa small island states.
Pero MEP y AVP a vota contra tal supervision y hasta ta dispuesto pa tira afo 600 miyon florin (interes halto ta 30 miyon florin extra den un periodo di pago di 20 aña pa no acepta Raft) djis pasobra e dos partidonan aki kier sigui malgasta placa di pueblo. Ta e pueblo, ta e pagador di impuesto, ta e trahador tin cu scupi e 600 miyon florin aki pa tire den bari sushi. MEP y AVP no tin interes di pueblo na pecho, pesei nos ta hasi un yamado na tur otro partido, ban forma un alianza contra MEP y AVP den 2024.
Mira un ehempel con e prioridadnan di e gobierno actual ta robez. Mi a laga un plan atras pa den 2023 aumenta e entrada financiero di tur maestro cu tin riba 38 aña di edad. Ma splica esei den e overdrachtsdocument entrega na e minister actual. Nos ta termina 2023 sin aumento financiero pa nos docentenan. Ma hiba un maneho financiero estricto pa por a aumenta na 2021 e normbedrag, inverti prome den e alumnonan, y e siguiente lo tabata inverti den e maestronan. Pero e gobierno actual ta malgasta placa innecesariamente. En vez di inverti den docentenan, den agricultura cu ta algo productivo, den baha impuesto y facilita remedi pa nos grandinan, pero ta opta pa sigui manka e cartera di e ciudadano. Pesei ban forma un alianza contra MEP y AVP den 2024, ReD ta desea pueblo di Aruba feliz dianan di fiesta y tur cos bon den 2024. Un danki na tur nos miembro y simpatizantenan cu a brinda nos sosten den 2023. Un feliz 2024 pa un y tur.