ORANJESTAD,Aruba
Oficialmente tur Centro di Cuido y Guia di Mucha di 0 – 12 aña (Créche) por cuminsa ofrece servicio desde 25 di mei proximo esaki cu aprobacion di Gobierno di Aruba como tambe Team di Maneho di Crisis. Tur centro di cuido di mucha a cera pareu cu e scolnan for di 16 maart y awo ta cuminsa e fase pa habri e centronan di cuido di mucha bek. Cu nos muchanan den mente, como metodo di precaucion pa prevencion di COVID-19, Ministerio di Asuntonan Social conhuntamente cu Fundacion Pa Nos Muchanan (FPNM) y DVG a traha un Protocol Nacional pa e Centronan di Mucha, pa asina tur Centro ta riba e mesun liña, ora ta trata prevencion di COVID-19.
PROTOCOL COVID-19
Awe tur e 117 créchenan inscribi na FPNM a haya e protocol y un carta di splicacion relaciona cu e habrimento di e centronan di mucha. Pa garantisa siguridad di higiena y salud di nos muchanan nos ta pidi tur Centro pa haci e preparacionnan necesario pa asina por cumpli cu e exigencianan minimo menciona den e Protocol. Y bo centro no ta inscribi na FPNM, ta haci apelacion pa haci esaki den e dianan siguiente.
INVITACION PA TUR LIDER, DIRECTIVA Y/OF PROPIETARIO DI CRÉCHE
Pa motibo di distanciamento social y ‘samenscholing’ nos no por tene un dia informativo fisicamente manera ta custumber. Como solucion a opta pa organisa un programa informativo interactivo. Esaki lo tuma lugar dialuna, 18 di mei, 10:30 am pa 12or pm na Telearuba. Di e forma aki ta informa y contesta e preguntanan di tur centro relaciona cu e protocol cu nan a ricibi awe. Tambe lo tin un panel consistiendo di e representantenan di: Departamento di Salubridad Publico (DVG), FASE helpdesk, Departamento di Labor y Investigacion (DAO), Beleids Adviseur di Minister y Fundacion Pa Nos Muchanan (FPNM) pa contesta tur e preguntanan. Durante e programa por manda bo preguntanan via sms of whatsapp. E number di telefon of mail pa manda e preguntanan ta: 5971323 of forum@telearuba.aw Ta di sumo importancia pa boso pasa den e protocol prome y djey formula boso preguntanan pa manda.
Tambe por bishita website di FPNM pa haya un bista di FAQ (frequently asked questions). Asina por haya contesta riba e preguntanan cu kisas mas Centro ya a haci caba. Pa mas informacion, por tuma contacto cu FPNM na, 588-0856 of 583-4247 of E-mail na info@fpnm.aw of manda un mensahe via nan facebook messenger.
