“Relashoná ku un publikashon den kua ta pone mi integridat komo gezaghèber i di diputadonan (sin menshoná nan nòmber) i tambe di empleadonan públiko na diskushon, mi ta enfatrisá ku ami semper a sirbi interes di komunidat boneriano segun mi honor i konsenshi i semper mi lo sigui hasi esaki tambe.
E preguntanan ku e artíkulo ta trese dilanti, anteriormente a keda diskutí ampliamente tantu den Konseho Insular komo den medionan di komunikashon. E tempu ei esaki a kondusí na laga un instansia independiente evaluá e failnan Chogogo i Sunset, pasobra Kolegio Ehekutivo i Konseho Insular ta haña importante ku mester aktua den un forma presiso i eksakto kontra aktividatnan ilegal (di konstrukshon). Tur dos evaluashon, ku ta públiko, a konfirmá ku e proseso di dunamentu di pèrmit i e elaborashon riba tereno di supervishon i mantenshon di lei tin mester di mehorashon. Debi na Boneiru su kresementu fuerte a resultá ku e kapasidat di ehekushon di e aparato gubernamental no ta sufisiente mas.
P’esei mi ta kontentu ku nos a stipulá den Akuerdo Intergubernamental ku Ministerio di Asuntunan Interno i Relashonnan den Reino ta fasilitá nos e medionan nesesario pa fortifiká e aparato. Mi ta haña importante pa enfatisá ku hopi tempu promé ku publikashon di ámbos rapòrt, ya kaba mi a kombersá ku e sekretario di estado di Relashonnan den Reino tokante mehorashon i fortifikashon di Direktorado di Supervishon i Mantenshon di Lei. E proseso akí ta kanando ful spit. Tambe dos aña pasá, relashoná ku e aktuashon indesisivo ku mi a konstatá dentro di e organisashon atministrativo den kaso di notifikashon di (supuesto) violashon di integridat, mi a instituí un Ofisina di Integridat.
Finalmente mi ta tira e sugerensia ku den mi aktuashonnan mi ta laga interesnan privá hunga un ròl, leu for di mi. Dentro di Kolegio Ehekutivo a hasi palabrashonnan bon kla tokante esaki, ku kada miembro di Kolegio Ehekutivo tin ku tene su mes na dje: ora ta papia tokante failnan kaminda un hende for di sírkulo di relashon di un miembro ta enbolbí, e miembro en kestion no ta tuma parti na e deliberashonnan. Na mi opinion e publikashon en kestion no ta balorá e esfuersonan ku Kolegio Ehekutivo i Konseho Insular, e aparato atministrativo, mi gabinete i mi mes – ku sosten konstruktivo di e ministerionan enbolbí – ta hasi pa alsa kalidat di gobernashon i di ehekushon na un nivel mas haltu. Ta importante pa nos tur dediká nos tempu i nos energia na e proseso akí.”