Faltando algun ora prome cu eleccion, mi deseo ta pa nos pueblo votador, por uza e oranan pa reflexiona riba e rumbo y destino di e pais aki! Partido UPP pa 8 aña largo, desde su prome participacion na eleccion 2013 a bin ta hiba un oposicion pafo di Parlamento tanto contra e gobierno berde como esun di signatura geel. Un oposicion na unda cu esaki ta necesario y hopi biaha enfoca riba mal gobernacion y posibel actonan di corupcion.
Tambe UPP ta presenta su plannan y visionnan cu ta realistico y realisabel. Den e dianan aki, na momento cu a bira obvio cu tin eleccion adelanta, hopi ta esnan cu a core drenta den e arena di oposicion, mientras cu e ultimo añanan ta UPP, apesar di no a haya e sosten, a haci un trabou mas grandi mes, cu e partido di AVP den oposicion aki na Aruba. P.e. riba e asunto di incinerator grandi y chikito a pone hopi infasis riba e falta di realismo pa logra esun prome y riba otro nos a trata na mustra riba e tanto maniobra y patrañanan pa yuda socionan di partido POR un banda y amigonan finanzista.
Awor atrobe nos ta tende hopi riba e asina yama modelo Waste to Energy, unda cu intencion ta pa invita companianan bin haci bidding pa esaki. Di un banda esaki lo bay costa hopi placa na inversion y di otro banda ta nifica fin di Serlimar, cu lo bira djis un compania di lanta sushi, cu despues lo disparce.
UPP ya for di tempo cu a opone e incinerator grandi, nos a bin cu e modelo SINERGIA, cu ta consisti di tecnologia ya presente riba e isla, cu den pasado a funciona. Ta trata aki di p.e. e planta di ECO-GAS y e planta di Bouldin & Lawson (cu por wordo rehabilita), y asina nos por cuminsa handle e sushinan di cas y comercia cu ta wordo produci tur dia! Di e manera aki tambe ta scapa SERLIMAR y cu lo no tin nodi cera. ECO-GAS di e forma aki ta separa e sushi cu e tin mester pa su operacion y despues B&L ta trata e resto combertiendo esakinan den un fluff cu por wordo uza pa yena buraconan cu tin rond Aruba. Pa loke ta e dump, esaki lo mester haya un atencion riba un termino tiki mas largo y pesey lo mester pensa riba “caping” di esaki pa contene y wanta e sushi na su lugar y no end up den laman. Den e siguiente fase, lo mester atende cu e cero di sushi e ora, pa medio di e sistema di “mining” cu por wordo procesa eventualmente dor di B&L of un otro tipo di procesamento.
E sumanan inverti sigur lo ta hopi mas abou, cu cualkier aventura nobo cu nos kier bolbe bay start, cu lo costa tempo, mientrastanto nos ta keda yena Ser’i Teishi cu bales, cu tambe alfinal ta bira un peliger tanto riba tera (gasnan) y bou tera (contiminacion di awa subteraneo).
Esaki ta un simpel ehempel di con UPP ta mira cu nos por atende cu nos desperdicio aki na Aruba. No ta tempo pa bay busca otro solucionnan y otro tecnologia. Sino di pone e tecnologia y conocemente presente riba nos isla funciona, sin BOYCOT y sin FABORECIMENTO di compinchinan. Ta tempo pa actua y no di bolbe bay haci estudio.
Asina nos tin mas ehempel riba otro tereno cu nos promesanan ta realistico y no djis haci un tira pa asina gana bo voto! UPP, lista cora tey pa bo!