ORANJESTAD,Aruba
Parlamentario Endy Croes mester cuminsa na bisa cu e no tin problema cu diferente Landspakketten cual ta contene reformenan cu Hulanda kier implementa pa Aruba, Curacao y St Maarten. Aruba a inicia e proceso di diferente reforme promer cu Hulanda a pidi pa esaki. Sinembargo e forma cu Hulanda kier impone esaki estilo “eenrichtingsverkeer” mara den un Rijkswet jamando esaki Consensus Rijkswet ta lokual ta hasi e practika di Hulanda uno inaceptabel. Tweede Kamer e siman aki a cuestiona Knops fuertemente riba e proceso incorecto cu Knops y Hulanda ta encamina pa impone un rijkswet jamando esaki un consensus rijkswet. Asina Bo no ta jega na consensus y tampoko ta e manera pa atende cu paisnan igual den Reino. Ban trata otro cu respet.
/// Na 2018 Tweede kamer a hasi un investigacion riba islanan:
Na aña 2018 Tweede Kamer a hasi un investigacion riba desaroyo social economico y financiero di e parti caribense den Reino entre añanan 2010 pa 2018. Na 2019 a presenta e resultadonan na e comision fiho di Koninkrijksrelaties di Tweede Kamer. A trata na crea mastanto posibel un bista basa riba hechos entre aña 2010-2018. Despues di esaki Tweede Kamer na october 2019 a hasi un peticion na Economisch Bureau Amsterdam ( EBA) pa hasi un siguiente investigacion cual a conclui den e rapport Kleine eilanden Grote uitdagingen.
/// Rapport Kleine eilanden Grote uitdagingen:
E rapport aki a wordo traha pa Economisch Bureau Amsterdam (EBA) riba peticion di Tweede Kamer y a wordo entrega na Tweede Kamer mei 2020. Desde october 2019 a inicia cu e investigacionnan cual a termina rond maart 2020. Durante entrada di corona crisis a amplia e investigacion y a hasi un estudio extra unda a projecta e posibel impacto financiero economico di Corona Crisis pa Aruba-Curacao y St Maarten( ACS) y a incorpora esaki den un addendum. Alaves a duna nan recomendacion y conclusion na final. Di acuerdo cu Economische Bureau Amsterdam ( EBA) apesar cu islanan ( ACS) tin retonan grandi financiero economico toch nan ta den un posicion faborable den comparacion cu henter e region caribense. Algun rason pa esaki ta nan nivel halto di prosperidad, free enterprise, un potencial enorme pa economia cu no a wordo explota ainda, institucionnan fuerte y nan posicion den Reino. Efecto di lock down a trese retonan grandi pa henter e regio caribense incluyendo (ACS). Ta hopi kla cu sin ayudo internacional islanan caribense ta den problema hopi grandi. Primordialmente como cu nan fuente di entrada ta depende un gran parti riba toerismo. Asina a recomenda pa traha riba un plan integral di reorganisacion ( hervormingsprogramma) pa hasi e islanan di Reino mas resiliente y resistente cu un economia mas faborabel cu mihor perspectiva pa futuro.
/// A hasi e estudio basa riba Literatura y data analyse:
Economische Bureau Amsterdam a basa su estudio riba diferente literatura y tambe data analyse. A usa estudionan hasi door di entreotro Nacion Unie, OECD( Organisation for Economic Cooperation and Development), IMF ( International Monetary Funds), UNDP ( United Nations Developing Program, Small Island Developing States) y Worldbank pa cu region caribense. Basa riba tur e informacionnan aki a produci un rapport cu recomendacionnan final. Porcierto un bon rapport cu hopi informacion. E recomendacionnan di e rapport aki Hulanda a comberti den Landspakketten cual Hulanda ta imponiendo actualmente riba Aruba, Curacao y St Maarten. Sinembargo e manera con Hulanda kier pusha e islanan pa logra implementa esaki no ta esun corecto y ta contra tur principio di bon gobernacion. Lo amplia mas riba esaki den dianan nos dilanti