Lider di Fraccion di MEP, Hendrik Tevreden a
referi na e rapport di e Economische Bureau Amsterdam (EBA) cu recientemente a evalua e
leynan y protocolnan di supervision financiero di Aruba, Corsou y Sint Maarten. Esaki riba
peticion di Hulanda mirando cu a palabra cu lo evalua esakinan periodicamente. Esaki tabata
e caso atrobe.
Tevreden a sigui bisa cu pa loke ta e evaluacion, esaki relativamente a sali na fabor di
Aruba. Final di siman pasa e rapport a wordo manda bek pa Tweede Kamer. Sinembargo,
mientrastanto na Aruba ta mira cu oposicion e unico cos cu nan a ‘pik mee’ ta cu e maneho
financiero no a mehora.
Pero mester remarca si, cu e rapport ta contene hopi mas aspecto cu ta bon pa Aruba.
E parlamentario a repasa riba algun di e puntonan cu nan ta menciona. Nan ta splica
cu loke a wordo realisa pa Aruba ta cu tin un reduccion di e debenan. Ta mira un tendencia di
bahada den gastonan di personal di pais Aruba, cu pa hopi aña a wordo mal uza pa e
gabinetenan Eman I y II.
Tevreden a enfatisa cu aworaki ta mira un reduccion den loke ta gastonan di personal
den un manera structural.
Tambe ta wordo bisa cu un punto hopi importante ta cu pa loke tin di haber cu e
normanan financiero, segun protocol, Aruba ta cumpliendo cu esaki. Unda cu no tin acuerdo,
esakinan ta bay den acuerdo cu Conseho di Minister di Reino.
Hopi importante y cu mester subraya ta cu tin un transparencia riba loke ta finansas
publico di pais Aruba. Den e añanan anterior esaki no tabata e caso. Aworaki ta mira
puntonan importante cu ta wordo remarca den e rapport aki. “Pero esun di mas grandi ta cu
tin un transparencia aworaki riba locual ta finansas publico di Pais Aruba”, Parlamentario
Tevreden a declara.
Si Hulanda lo a cumpli cu e palabracion di duna Aruba interes abao desde 2015, e
debe di Aruba sigur, segun calculacion cu a wordo haci, lo tabata 21% mas abao. Otro
conclusionnan cu a sali afo ta cu tin cu cambia e normanan, cu mester ahusta esakinan locual
ta algun cu Prome Minister Evelyn Wever-Croes a bin ta dialogando na mesa cu Secretario di
Estado Sra. Van Huffelen pa hopi tempo caba.
Esaki ta un tema cu sigur e mandatario lo bin cu un ‘update’ riba con leu nan ta cu e
negociacionnan aki. Pero ta bon pa menciona cu ta Hulanda mes a tarda, pa rasonnan politico
of di terkedad, di no cumpli cu nan palabracionnan cu tabatin di duna Aruba un fiansa cu
interes abao desde 2015 caba.
Finalmente, Hendrik Tevreden a expresa cu sigur tin caminda pa mehoracion pa
locual ta trata e rapport aki di EBA cu a sali. Pero locual ta e puntonan cu a wordo menciona,
tin un tendencia na e reduccion di e debe, como tambe na e gastonan di personal.
A purba na maneha e normanan den protocol y cumpli cu nan mas tanto cu ta posibel.
Sinembargo, e punto mas importante ta e transparencia den finansas publico loke ta indica cu
e rapport ta na fabor di gobierno di Aruba. Cu tin caminda pa drecha, esey ta algo cu ta bay
haya den tur rapport.
E conclusion ta cu e rapport ta mustrando e trabao grandi cu e gobierno actual ta bin
ta haciendo y e adelanto cu awe por mira riba finansas publico di Pais Aruba, Hendrik
Tevreden a finalisa bisando.