Rainbow Warriors Core Foundation ta ripiti mensahe di juli 2016 cu lo ataca tur instancia na Aruba cu ta discrimina contra derechonan humano LGBTQI

Y lo denuncia e apelacion anuncia pa gobierno den casacion bou presion di misanan evangelico

Cu asombro y asco nos a tuma nota di e decision di Gobierno di Aruba pa bay den apelacion contra e veredicto recien cu ta bisa cu nenga di introduci matrimonio di mesun sexo ta viola tratadonan internacional cu ta prohibi discriminacion contra di e comunidad LGBTQI.

Nos ta compilando datos riba TUR misa evangelico pa kehonan penal y ta alabes spierta Gobierno cu ora Gobierno y Parlamento di Aruba doblega pa presion di algun misa evangelico, nan tin cu compronde cu nan no por conta mas confiansa di e pueblo cu estado y iglesia ta separa y nos constitucion ta guia maneho politico y consecuentemente tin cu saca nan conclusion y disolve gobierno.

Pa refresca menoria ata nos texto di nos comunicado di 8 juli 2016:

Dia 30 di juni 2016, den un voto historico e UN Human Rights Council, esta e Conseho di Derecho Humano di Naciones Uni a aproba cu 23 voto pro, 18 contra y 6 abstencion un resolucion pa proteccion contra violencia y discriminacion basa riba orientacion sexual y identidad di genero.

Cu e acto aki awor ta bira posibel na un nivel internacional denuncia na Naciones Uni discriminacion y violencia contra esnan di orientacion sexual y identidad di genero no heterosexual esta e comunidad LGBT.

Basa riba e resolucion aki Rainbow Warriors Core Foundation en estrecho colaboracion y dialogo cu comunidad LGBT na Aruba lo determina strategia pa ataca tur esnan na Aruba, sea partido politico, clero, cualkier organizacion of individuo cu haci su mes culpabel na discriminacion of violencia contra e comunidad LGBT na Aruba.

Como parti di tres red grandi mundial di derecho humano Rainbow Warriors Core Foundation lo alavez fiha campanja internacional di prensa pa denuncia e actonan abierto di discriminacion conra e comunidad LGBT na Aruba dor di e pastor Szpila e demas clero y lo haci denuncia na Vaticano.

Como organizacion internacional cu a para hunto cu e comunidad LGBT desde e principio pa defende nan derechonan nos lo para nan tras y haci e compromiso pa pone nos recursonan internacional na nan disposicion incondicionalmente.

LGBT Rights are Human Rights.