E ta logico cu ora bo ta fia placa bo tin cu paga bek. Sinembargo e condicionnan bou cual Hulanda kier obliga nos paga ta inaceptabel y mester ta inaceptabel pa tur cu ta stima e pais aki. E ta duidelijk cu na ningun momento nos por papia di un consensus paso tur parlamento, incluyendo parlamento Hulandes, a desaproba e proceso encamina pa cu e ley di COHO y e RAft.
COHO a baha for di mesa pero ainda Hulanda no por splica dicon RAft si tin cu keda. Pa pueblo compronde un poco mas miho, Evaluatie Adviescommissie cu a evalua RFT a conclui den un rapport cu e supervision di Rft ariba Corsou y Sint-Maarten (e mesun cu nan kier impone awor riba Aruba) a stroba e crecemento socio-economico di e islanan. Un economia cu no por crece ta nifica un economia tranca, un economia unda no por inverti, un economia unda cu no lo por genera mas placa pa paga nos debenan.
Manera ya menciona, e ta logico cu ora di fia tin di paga bek y na esaki tin condicionnan mara, sinembargo e ta incomprendibel con e condicionnan aki bay asina leu pa kita e autoridad di Parlamento di Aruba. Si no ta pa e pandemia cu a asota mundo, ningun momento nos lo mester a bati na porta di Hulanda pa fia placa! E placa aki tawata pa mantene cabes di nos pais riba awa, pa asina Gobierno por a paga Fase, Loonsubsidie y brinda sosten financiero na companianan chikito y mediano. Nos ta un pais autonomo, e supervision cu nos tin awor ta funciona. Nos ta e unico pais den Reino cu tin surplus, nos debenan a baha te cu 88.3% e aña aki siendo cu na final 2020 e tawata riba 100%.
Cu gobernacion responsabel pueblo por mira con nos mes por, pues pakico pone tur cos den man di Tweede Kamer y Minister di Finansas di Hulanda? Nan sigur no ta compronde e contexto di nos pais y tampoco ta interesa den desaroyo berdadero di nos pueblo. E ta incomprendibel con tin politiconan, gremio y demas persona cu ta bisa di tin pais na pecho ta grita pa gobierno firma e RAft manera cu e ta awor. Bo no mester ta sostenedor di partido MEP pa bo ta contra di e RAft, bo mester ta un Arubiano cu ta stima su pais di berdad, cu ta confia den su profesionalnan y cu por bisti e pechi di Aruba prome cu esun di bo partido politico di escogencia.