Gabinete Wever-Croes II recientemente a somete na Parlamento su propuesta di cambionan den e LIM. Mescos cu pueblo en general, Raad van Advies tabata tin hopi remarca cuestionando no solamente e logica di e reparticion pero tambe specificamente e decision di sinta cu 8 ministro. Nan ta critica cu na Aruba cada cuatro aña tin cambio den e LIM y nan ta argumenta cu esaki no ta contribui na continuidad di maneho. Nan ta pidi pa hancra e LIM pa un periodo mas largo (algo inclui den plan di partido di Accion21) y determina e reparticion di ministerio a base di balans, concordancia y preferiblamente unicamente 7.
Nan ta argumenta cu tin tres ministerio bao di e proposicion actual cu responsibilidad pa unicamente 3% di e presupuesto nacional. Mirando esaki ta dificil hustifica 8 ministerio especialmente considerando e situacion financiero dificil y e pandemia cu ainda no a caba. Tambe nan ta lamenta cu e reparticion no a sigui e Landspakket mas di cerca pa asina mehora su implementacion. RvA ta te hasta bisa cu e balans entre e ministerionan ta asina malo cu e lo por perhudica stabilidad di gobierno.
No tin ningun principio pa un ministro mete den cartera di otro cu excepcion di Prome Ministro kende ta responsabel pa unidad di maneho. Ariba e base ey nan ta cuestiona move integridad pa un ministro cu no ta MinPres. Por ehempel tanto MinPres como MinHus lo mester pidi Director di Veiligheidsdienst Aruba autoridad pa comparti informacion cu MinTINO. E acuerdo receintemente firma entre Eagle LNG y WEB ta mustra cu RAIZ su deseo di traha horizontal a keda na palabra so, necesitando un mihor distribuicion di cartera.
Raad van Advies ta argumenta cu un organo independiente di consulta y conseho crea pa constitucion di Aruba NUNCA mester ta parti di un acuerdo di coalicion. Pesey nan ta desrecomenda pase S.E.R. fe bao MinPres pa Ministro di Economia. Entre otro nan ta argumenta cu no tin suficiente splicacion pakiko cuido pa salud mental a pasa di ministerio di salud pa asuntonan social y ta cuestiona si no lo tabata mihor pasa cuido di adiccion en bes. RvA ta argumenta cu cuido pa salud mental y cuido pa anciano ta mihor agrupa cu ministerio di salud.
Relacion entre e carteranan di MinTINO ta keda completamente obscuro pa RvA. Transporte ta mas relaciona cu economia y/of turismo. Naturalesa ta mas relaciona cu infrastructura y planificacion teritorial. Cuido di anciano lo ta mihor sirbi bao salubridad of asuntonan social. E ministerio di educacion y deporte su splicacion tabata breve y sin contenido real segun RvA y nan ta pidi debido splicacion. Tambe nan ta nota cu Fundacion Lotto pa Deporte no ta cay bao di e ministerio y no tin claridad bao cua ministerio e ta cay.
Energia lo ta mihor agrupa cu economia y desaroyo sostenibel. RvA tambe ta recomenda pasa turismo pa ministerio di economia manera, algo cu semper tabata asina mirando cu e ta representa por lo menos 90% di nos economia. Cultura lo ta mihor agrupa cu educacion y gobierno no ta duna splicacion suficiente pakiko actualmente e ta cu finansas. Si nan ta argumenta cu e companianan estatal y semi-estatal lo ta mihor bao ministerio di finansas cu posibilidad di duna mandato na otro ministro pa maneho specifico.
Lamentabel cu nos ta mira e coalicion actual hisa y pone ministerio segun nan caprichonan sin tene cuenta cu interes nacional. Nos ministro di husticia no ta un hurista dus reponsabilidad pa legislacion ta pasa pa prome ministro. Xiomara no tabata kier finansas dus ta agrupa cultura cune pa e haya algo leuk pa haci. Dangui no ta laga turismo bay dus e no por wordo agrupa cu economia. Ursell a crea un ministerio sin sentido bao cual e ta kere cu e lo por trece solucion pero rwzi, parkietenbos tur ta keda bao infrastructura cu ta cay bao Prome Ministro confirmando nos preposicion cu e lo fungi como coordinador cu titulo di ministro.
Siguiendo e consehonan di Raad van Advies un mihor reparticion lo ta algo manera lo siguiente:
- Prome Ministro; Ministro di Asuntonan General, Organisacion Gubernamental y Integridad
- Ministro di Asuntonan Economico, Turismo, Transporte, Desaroyo Sostenibel y Energia
- Ministro di Finansas (incluyendo empresanan semi-estatal) y Landspakket
- Ministro di Infrastructura, Comunicacion, Planificacion Teritorial y Naturalesa
- Ministro di Asuntonan Social, Enseñasa, Cultura y Deporte
- Ministro di Salud Publico (incluyendo cuido pa salud mental y cuido pa anciano) y Labor
- Ministro di Husticia, Integracion y Inmigracion
Ban wak si gobierno entrante lo dicidi di sigui cu su capricho di reparti ministerionan segun personalidadnan politico of priorisa interes nacional.