Recientemente Quota a organisa un evento caminda a instala 3 miembro nobo y alabes a conmemora Dia di San Valentin celebrando Amor y Amistad.
E tres miembonan nobo ta: Vicky Arens-Tjon-A-Tjoe, Monique Giel-Labad y Kaveri Raghunath. Past President Ivy Simon a conduci e ceremonia di instalacion y a enfatisa e obhetivonan di Quota, e responsabilidad di cada miembro y e importancia di servicio na nos comunidad.
Quota International of Aruba ta un organisacion boluntario di ehecutivonan femenino cu ta enfoca riba mehoracion di calidad di bida di esnan menos fortuna den nos comunidad, specialmente esnan cu problema di oido y habla y tambe ta sostene hopi programanan pa hende muhe den dificultad y muchanan di menos recurso.
Cada miembro nobo ta brinda nan talento y experiencia unico na benificio di nos comunidad.
E demas miembronan a haci uzo di e oportunidad pa yama bonbini na e 3 miembronan nobo y felicitanan.
E evento tabata un oportunidad pa miembronan reconecta despues cu hopi actividad no por a tuma luga den e ultimo 2 añanan.
Quota International of Aruba kier a anuncia tambe cu ta acepta ainda peticion pa apoyo financiero. Tin oportunidad pa entrega un peticion te cu 25 di februari 2022. Esaki ta pa organisacionnan cu tin un proyecto specifico cu ta cay den categoria di ayudo pa hendenan cu problema di oido, mucha of hende muhe den dificultad.
Por manda e peticion na: qia.secretary@gmail.com
