Un oficial Ruso a adverti cu si e rebelion di Prigozhin ta exitoso, e arsenal nuclear grandi di Rusia por cay den man di mercenarionan di Wagner Group y representa un menasa existencial pa mundo.
“E historia di humanidad no a mira ainda e arsenal mas grandi di arma nuclear bou di control di bandidonan”, Dmitry Medvedev, vice-hefe di e Conseho di Siguridad di Rusia presidi pa Presidente Vladimir Putin, a bisa den remarkenan cu a wordo transmiti pa agentenan di noticia Ruso. “Un crisis asina no lo ta limita solamente pa frontera di un pais, e mundo lo ta na frontera di destruccion”.
El a agrega cu “nos no lo permiti un cambio asina”.
Medvedev, un ex presidente Ruso, a bira notorio pa su comentarionan straño relaciona cu e guera na Ukrania, e menasa di escalada nuklear, y Rusia su relacionnan cu ta deteriora cu e nacionnan di Oosten.
Oficina di estado y ministernan di exterior a duna nan opinion riba e noticia cu e mercenario Wagner Group y su lider, Yevgeny Prigozhin, a cuminsa un marcha pa Moscu y cu presidente Ruso Vladimir Putin a priminti pa kibra tur rebelion.
Merca Secretario di Estado Antony Blinken a tweeté riba diabierna, “A papia awe cu ministernan di exterior di G7 y e UE. Alto Representante pa Asuntonan Exterior y Politica di Siguridad pa discuti e situacion actual na Rusia. Merca lo keda den estrecho coordinacion cu aliadonan y partnernan mientras e situacion ta sigui desaroya”.
Ministerio di Asuntonan Exterior Ruso tambe a emiti un declaracion diasabra alertando tur pais di Oeste “contra cualke sugerencia di posibel uzo di e situacion interno pa logra nan metanan rusofóbico”.
“E tentativanan aki ta futil y no lo haña un reaccion ni den Rusia ni entre e forsanan politico sano na exterior”, e declaracion a lesa. “Nos ta convenci cu den un futuro cerca e situacion lo haña su solucion, digno di e sabiduria antiguo di e pueblo Ruso y e Estado Ruso”.
E grupo Wagner a yega 60 milla den Rusia, bisando di a tuma control di e ciudad Rostov-on-Don, for di unda e comando militar ruso a coordina su atake riba Ukraine. Prigozhin a inicia e marcha despues di a afirma ayera cu Kremlin a autorisa un atake contra su forsanan, cu a mata un cantidad enorme di su tropanan.
Mundo ta sigui wak e desaroyo di e situacion, cu hopi oficial stranhero ta comparti nan pensamentonan riba medionan social.
Portavoz di Conseho di Siguridad Nacional Adam Hodge diabierna anochi a bisa: “Nos ta monitora e situacion y lo consulta cu aliadonan y partnernan riba e desaroyonan aki”.
Presidente di Ukrania Volodymyr Zelenskyy a bisa: “Esun cu scoge e caminda di maldad ta destrui su mes”.
“Pa hopi tempo, Rusia a uza propaganda pa tapa su debilidad y e estupidez di su gobierno, y awor tin asina tanto caos cu ningun mentira por sconde esaki”, Zelenskyy a agrega. “E debilidad di Rusia ta obvio. Debilidad di gran escala y mas largo Rusia tene su trupanan y mercenarionan riba nos tera, mas caos, dolor y problema e lo tin pa su mes despues”. Asina diferente medionan internacional a indica den henter e guerra cu Rusia a cuminsa cu ne contra di Ukrania.
