Tambe tin un otro parti cu ta e pueblo mes , pueblo sa con e mashin cu yama gobernacion ta funciona ? Lamentablemente cu hopi biaha e no ta asina y hopi biaha nos ta haya e tendencia di culpa un politico of culpa un partido politico esaki no ta sosode na Aruba so pero den tur parti mundo tin e tendencia aki.
Sinembargo nos mester mira bon con ta vota debi mester wak bon e paso nan y kico a pasa cu nos pais bisiña cu ta Venezuela unda cu nan sistema a faya completamente. Aruba mester siña di lesnan asina y e ta cuminsa na educacion, un educacion con e ta traha y con e ta supoce di traha, debi con cu nos kier bire of mire e palabra democracia ta significa cu ta e pueblo ta reina riba su mes, y pueblo no por reina riba su mes , no por forma parti di un democracia si nos mes no sa con e ta funciona.
Segun Jayburtt Dijkhoff vota no ta un carnaval di cada 4 aña cu un pensamento no mucho cla pa kico y pa ken nos ta bay vota. Nos no ta vota pa un partido di futbol pa e ta e partido ganado, no no ta asina,bo vota ta hopi mas cu esey. E voto di e ciudadano ta dirigi e gobierno den cua direccion e mester bay y e programa di gobernacion. Den e curso “Con pa Goberna un Pais “ esunnan cu participa lo ricibi e toolsnan con henter e sistema ta funciona, pero tambe con e la funciona den e ultimo decadanan y con nos por cambia esey pa sigui guia Pais Aruba.
Gobernacion tin dos aspecto loke ta un realidad ta cu ningun hende no ta wordo nombra como parlamentario of minister si e no Sali for di comunidad. Na mes momento por bisa cu comunidad ta vota pa cierto interesnan cu tin di haber cu interes economico , placa no ta yega, cupo di trabou, desempleo ect ect unda cu hopi biaha hende ta vota pa esey y esey ta normal den tur Pais.
Sinembargo loke cu ta haciun diferencia ta na momento cu un persona ta vota pa un instituto cu ta u partido cu ta den un sistema cu tin e interes general “algemeenbelang “ ta mas balansa. Hopi biaha ta pasa den practica cu e palabranan ta zona bunita riba papel pero na final e gruponan cu tin mas forsa nan ta haya prioridad den programanan di gobernacion. Segun Jayburtt Dijkhoff esaki ta loke ta bira un circulo vicioso cu next eleccion ta pone cu ciudadano pensa diferente y ta bolbe cambia di rumbo cu un otro ideologia pa purba esey y of kisas cu padushi lo a haya un tereno of yiunan a haya trabou ect ect, of si no a haya trabou of no a haya kier lo no vota mas pa e mes un partido pero e otro cu a compromete e ora lo cambia na e speransa di beneficio cu e ciudadano kier ricibi. Esaki dado momento ta crea un sistema di corupcion inconscientemente door di e custumbernan cu tin cual cu no ta na su luga y no ta bon ni pa e ciudadano y tampoco pa e Pais.
No ta solamente ta papia di corupcion na momento cu e minister ta ser gara y ta keda sentencia, pero ta papia aki di full un comunidad cu tin cu haya educacion di con e sistema ta opera y kico nos por haci pa nos yega na un sociedad berdaderamente husto.
Lamentablemente na e momentonan aki den comunidad ainda tin e mentalidad cu si mi mester di un peticion pa kico cu ta sea ta pa haya un tereno, trabou, permiso pa negoshi of kico cu e por ta, mi mester bati porta di un minister y haya un sita cu minister pa por haya ayudo pa por logra.
Sinembargo na mes momento ningun minister no tin e autorisacion pa move si no ta abase di ley , paso nos tur ta biba den un estado di derecho. Si ley no ta duna minister e autorisacion y mandatario no mag di complace e ciudadano , si acaso e mester hacie e ta bay contra di ley y e tin consecuencia nan pe. Hopi biaha un departamento ta supoce di hendel peticionnan pa ciudadanonan, pero kico realmente ta pasa den practica ? Segun Jayburtt Dijkhoff den practica ta mira dos cos, pueblo no sa hopi biaha kico ta e proceso , e confiansa unda pa cuminsa y con e ta wordo yuda den un termino rasonabel y si e no wordo yuda unda e lo por bay? Sea e tin cu bay Hues, LAR ken por yude ? Lamentablemente loke cu a constata den e investigacion hopi di e departamentonan di gobierno no tin un maneho y no tin e procesonan na ordo pa tur hende cana e caminda corecto. Hopi biaha e departamento tambe ta den buskeda kico pa haci. Esaki ta un señal cu e maneho di e departamento no ta na ordo.
Ta un secreto publico cu e maneho na Aruba, pero tambe den Caribe no ta bayendo bon. Hopi biaha esaki ta fayando pueblo , e ta fayando e transparencia y ta haci e ora cu e confiansa di pueblo den e sistema ta bay atras tambe, esaki ta un circulo vicioso.
E curso “Con pa Goberna un Pais “ ta sumamente importante pa nos por cambia e sistema, e ta algo urgente. Si mester mira e ultimo rapportnan di Algemene Rekenkamer y Raad van Advies ta mustra cu Aruba ta bay yega na un punto cu nos no por return di e dañonan cu e sistema actual ta causando. Aruba lo por yega na un punto unda cu hopi cos ta mina nos autonomia. Si Aruba mester sigui asina aki ta bay yega dado momento cu Hulanda ta bisa cu e fiesta a caba y por tuma e decision pa Aruba bira practicamente manera BES , pero kisas bou di otro nomber. Nos mester realisa cu autonomia no ta algo riba papel, pero autonomia nos tin cu mustra cu nos tin e capacidad y boluntad pa duna contenido, cual den e ultimo 4 decadanan basicamente e sistema a faya nos cu esey.
E invitacion ta keda pa tur partido politico, organisacionnan cu tin di haber cu maneho di Pais Aruba, aspirande nan cu kier bay den politica activo, pero tambe tur ciudadano interesa, profesionalnan cu kier sa mas di e investigacion cu a keda haci, e yamada ta pa nan por registra y participa na e curso “Con pa Goberna un Pais “ cu ta un curso di 6 siman unda cu lo bay paso pa paso pa wak con e sistema ta funciona y pa aplike mesora den bo trabou den bo campaña, den e maneho of den hasta con pa evalua si bo voto ta bay den un bon manera den e eleccion cu ta bay bin awor aki.
Ta importante pa bo sa y pa bo ricibi conocemento con e mashin cu yama Aruba ta funciona y cu lo mester funciona pa ami , pa abo y pa henter bo famia pa un miho Aruba pa nos tur. Por subi riba facebook riba fundacion SIKI y haya mas informacion pa inscribi pa e curso.