No ta un sekreto ku despues di debakel di Giro Bank i ENNIA pa motibu di un supervishon di nos outoridat lokal a trese un sentimentu di prekupashon bou di nos komunidat kon sigur i konfiabel nos instansianan finansiero ta. Banda di esei tin un preokupashon pa ku e ròl di Banko Sentral komo organo di supervishon di instansianan finansiero. Hopi pregunta tin di komunidat riba kon sigur otro instansia finansiero riba nos pais ta. Frakshon di MAN ta di opinion ku Banko Sentral komo instansia di supervishon mester traha riba oumentá i mantene e konfiansa di komunidat den nos sektor finansiero.
Na 2018 a hasi un ouditoria den Banko Sentral i a bini diferente puntonan di mehorashon den e trabou di supervishon di Banko Sentral. Ta bon pa splika tambe kon e proseso di mehorashon a tuma lugá i evitá ku den futuro nos por haña mesun situashon manera Giro Bank i ENNIA.
Konforme reglamento di orden Frakshon di MAN a hasi e siguiente preguntanan na Gobièrnu:
- Kuantu kompania tin pèrmit pa duna serivisio finansiero (banko i seguro) na Kòrsou?
- Kiko ta e situashon di solvabilidat di e diferente instansia finansiero?
- Tin kompania nan banda ENNIA ku “noodregeling”?
- Kuantu instansia finansiero tabata bou di “noodregeling” e ultimo 20 aña?
- Kon Banko Sentral por garantisá e trankilidat di solvabilidat pa e pueblo engeneral?
- Gobièrnu komo akshonista por duna bista kon implementashon di e puntonan di mehorashon a keda implementá?
Pa Frakshon di MAN e importansia ta pa pueblo tin trankilidat i konfiansa den nos sektor finansiero pero tambe den nos organonan di supervishon den e kaso aki Banko Sentral. Ta importante pa desaroyo di nos pais ku tur nos organonan vital di supervishon ta funshoná manera debe ser.