Atrobe nos a tende cu un boto a drenta na Rincon y basta bulto of purun di droga a wordo haya. A inverti asina hopi placa den nos systema di seguridad y realidad ta cu no ta sufficiente. Poco poco nos ta mira un aumento pa locual cu ta e botonan cu illegalnan ta drenta Aruba. E tristo ta cu hopi a perde nan bida pero asina mes nos por mira cu tin un aumento. Aruba ta un isla chikito y no tin cama pa tanta gente. Nos no sa si e radar ta wordo controla 24ora pa dia, pero algo mester wordo hasi paso seguridad di nos pueblo mester bin na prome lugar. Awor aki esaki no ta e caso. Nos por mira cu na Europa illegalnan a cuminsa domina y tin hopi crimen ta tumando lugar. Nos por lesa den prensa cu crimen ta aumentando entre otro violacion. Nos seguridad ta hopi importante tanto pa nos pueblo pero tambe pa nos turismo.
Aruba no tin terreno mas ni pa nos yuinan di terra. E Arubiano ta pasa un dolor di cabez pa haya un terreno pa construi su cas y no por papia mes di cumpra un terreno propiedad paso e prijs ta inpagabel. Nos por mira verkavelingsplan di terrenonan propiedad pero mayoria ta wordo bendi cu stranhero. Nos tin un problema grandi paso Aruba no por permiti di bende su mes pa placa. Si sigui asina aki 5 aña tin mas stranhero den e area laboral cu nos yuinan di terra mes. Inmaginabo un Arubiano bira stranhero riba su propio isla. Nos no por permiti cu yui di terra ta wordo discrimina riba su propio pais. Nos tin un gobierno cu no ta interesa den e bienestar di su pueblo. Aruba lo perde su identidad si nos sigui den e direccion cu nos ta bayendo. Aruba a pasa den duro na cuminsamento di Status Aparte y turismo a resulta e salbabida. Turistanan tabata bishita Aruba pa e trato cu nan ricibi di Arubianonan. Cordial y amabel. Ya caba nos por a tende cu tabata tin pleito entre turistanan crucero y esnan cu ta keda den hotel pavia di gasebo. Tur nos beachnan ta den man di stranhero y propio yui di terra no por disfruta mas di trankildad nan nos beachnan. Mester pone un paro na mas construccion di hotel pa asina nos no perde e saco y perde e cangreuw.
Aruba tin 20 aña ta papia riba e planta di purificacion na Bubaliplas y nos ta den un emergencia y nada ta wordo hasi. Papia hopi y hasi nada. Puro gañamento. Nos carreteranan ta manera cu riba luna nos ta biba. Aruba ta mas sushi cu nunca. Aruba no ta produci su propio cuminda y ora e scarsedad di cuminda bati na nos porta nos lo bay grita pero ta laat paso e baca a hoga caba. Na aña 2020 mundo a paralisa y nos a sufri hopi daño. Kico lo pasa si nos no tin barco cu alimento drenta nos waf?
Nos oracion mester ta Dios yuda nos paso nos ta mira mas maldad cu nos ta mira bondad. No ta tempo mas pa sigui drumi. A yega e momento cu voz di pueblo mester wordo scucha. Aruba no por papia di ta bendiciona cu tur locual cu ta pasando. Esaki ta e momento pa nos lanta para sin miedo y bisa ta basta no mas medida. Nos no por biba na rudiya mas y mester bisa ta basta cu abuso. Mas grandi e herida ta mas tempo lo e tarda pa cura. Aruba ban salba nos pais for di gara di e gobierno socialista. Dios nan a nos banda ken por ta contra di nos. Partido Curpa e unico alternativa.
