Kralendijk, 18 di novèmber 2020 – Den un karta pa gezaghèber Edison Rijna konsehal Daisy Coffie a hasi diferente pregunta pa pueblo boneriano haña un bista mas kla di kiko e Ordenansa di Emergensia di 16 di novèmber 2020 ta pidi di nan. Sra. Coffie a trese dilanti ku den e konsiderashonnan relashoná ku e Ordenansa di Emergensia di 16 di novèmber 2020 gezaghèber ta skirbi: ‘Ku e medionan regular ku ta disponibel pa garantisá protekshon di siguridat i salubridat públiko, aktualmente no ta ofresé sufisiente alivio etc’. Relashoná ku e ponensia aki konsehal Daisy Coffie a pidi gezaghèber pa splika kua ta medionan regular ku ta disponibel. Tambe Daisy Coffie ke sa si e medionan aki ta prosedente di presupuesto di Boneiru òf di presupuesto di reino. Na di tres lugá sra Coffie ta puntra ku si aktualmente e medionan en kestion no ta ofresé sufisiente alivio, kua ta e pasonan ku gezaghèber a tuma pa debidamente disponé di sufisiente medio pa protekshon di siguridat i salubridat públiko na Boneiru.
Test di PCR ku no ta rekonosé
Segun konsehal Daisy Coffie artíkulo 4, insiso 1 di e Ordenansa di Emergensia ta indiká ku personanan di 13 aña òf mas ku ke drenta Boneiru mester bai durante 10 dia den karentena obligatorio si nan no por mustra un tèst negativo di PCR. Relashoná ku esaki sra. Coffie ta remarká ku awor aki ta konosí ku por sierto biaheronan ku ta biaha for di Hulanda pa Boneiru ta hasi mal uso di tèstnan di PCR ku no ta rekonosé, pa asina por biaha ku tur e konsekuensianan negativo ku esaki por tin pa nos komunidat. Esaki ta motibu pa den su karta Daisy Coffie a hasi e siguiente dos preguntanan: 1. Kua sanshon tin kontra kompanianan di aviashon ku ta permití e biaheronan aki subi nan avion? 2. Gezaghèber no ta di opinion ku for di Boneiru mester eksigí ku akinan nos ta aseptá solamente tèst di PCR ku departamentu di Salú Públiko di Boneiru ta hasi i rekonosé den koperashon ku RIVM?
Kantamentu, baliamentu i deporte
Tambe sra Coffie ta indiká den su karta pa gezaghèber Rijna ku artíkulo 6, insiso 1 sup e i artíkulo 7m insiso 1 sup d di e Ordenansa di Emergensia ta menshoná ku no por kanta ni baila. E kondishon pa no kanta segun Daisy Coffie no ta konta pa enkuentronan den misa. Relashoná ku esaki konsehal Coffie ta puntra si gezaghèber por duna un splikashon di e desviashon aki, ku no ta konta pa evento. Kontinuando su karta Daisy Coffie ta trese dilanti ku den artíkulo 13, insiso 4 e ordenansa di emergensia ta insistí ku te ainda no ta permití presensia di públiko na eventonan deportivo organisá. Segun e konsehal en todo kaso no a logra konvensé su persona kua ta e motibunan ophetivo pa esaki. P’esei e ta supliká gezaghèber pa duna un splikashon di e medida aki pa loke ta trata motibunan médiko i tambe pa loke ta trata eksperensianan den Reino riba e tereno aki.
Terminando su karta konsehal Daisy Coffie di Frakshon Coffie ta skirbi ku ta permití pa biaheronan for di un pais di riesgo haltu drenta Boneiru pa medio di tránsito den un di e paisnan ku eksepshon, basta nan ta kumpli ku sierto kondishonnan i relashoná ku esaki sra. Coffie ke sa di kua paisnan di riesgo haltu ta trata aki. Por último Daisy Coffie ta puntra kua ta e motibunan, basta si nan kumpli ku e mesun kondishonnan ku ora di pasa di tránsito den un pais ku eksepshon, pa no laga e biaheronan aki drenta Boneiru pa medio di buelonan direkto.
