Dia 24 di september proximo pa 3 di october 2023 como antesala pa celebra rehabilitacion di nos Heroe Pasional Tula y su compañeronan Gobierno di Corsou ta anuncia cu Siman di Cultura 2023 e aña aki ta di 24 di september pa 3 di october 2023.
Dia 3 di october ta fecha cu Gobierno Hulandes ta bay rehabilita nos Heroe Nacional Tula. Gobierno di Corsou a decreta un Aña di Conmemoracion Abolicion di Sclavitud cu ta for di 1 di juli 2023 te cu 1 di juli 2024 y p’esei Siman di Cultura 2023 ta keda dedica na conmemora 160 aña di Abolicion di Sclavitud.
Cu e lema pa e siman di Cultura: Lasonan Fuerte pa un futuro briyante, Corsou ta enfoca riba Libertad, Igualdad y Fraternidad. Tur esaki como antesala den cuadro di rehabilitacion di Tula.
Siman di Cultura ta un antesala pa conscientisa pueblo di e acto importante di e rehabilitacion di Tula y ta gosa di actividadnan tanto dirigi pa pueblo di Corsou y turistanan nos historia ta conta cu 160 aña pasa oficialmente sclavitud a keda aboli, a marca un punto di cambio den e historia di Caribe y Mundo.
Esaki a nifica e final di un periodo scur di opresion humano y explotacion, pero tambe a laga un herencia duradero cu ainda bo por sinti su efectonan den nos cultura y comunidad. Tur esaki ta pone luz riba e balentia di nos Heroe Nacional y su compañeronan. Nos Pueblo ta gosa di un herencia rico cu ta keda manifesta den nos cultura. P’esei den Siman di Cultura nos ta celebra hunto y crea lasonan fuerte pa un futuro briyante pa nos Pueblo. Como pueblo nos mester realisa cu hunto nos ta logra mucho mas cu di forma individual.
Pa e motibo aki ta masha importante pa forma lasonan di hermandat. Siman di Cultura ta un momento den aña cu nos ta haci diferente actividad hunto y cera conoci cu nos mes talentonan y potencial pero tambe esun di e otro.
Interogando cu otro nos ta fortifica nos lasonan di hermandat cu otro. Mas tanto nos uni den nos metanan comun mas resultado nos lo tin como pueblo. Lema pa Siman di Cultura 2023: Lasonan Fuerte Pa un Futuro Briante
Tema pa Siman di Cultura 2023: Como Siman di Cultura ta e antesala di rehabilitacion di Tula e tema di e aña aki ta locual cu nos heroe nacional a lucha p’e cu ta: Libertad, Igualdad y Fraternidat
Descripcion di Tema: E palabranan aki, Libertad, Igualdad y Fraternidat, Tula, lider maximo di e lucha pa libertad di 1795, a dirigi na Pader Jacobus Schink. E causa principal di e lucha di 1795 tabata e deseo persistente pa libertad cu tabata biba den curason di tur esunnan sclavisa.
Un anhelo asina profundo cu nan tabata dispuesto pa duna na bida p’e causa di libertad. For di e tempo ey, pasando di generacion pa generacion nos pueblo a conoce hopi cambio pero ainda nos ta den e lucha pa Libertad, Igualdad y Fraternidat.
Sector di Cultura y Deporte lo traha hunto cu Plataforma Sclavitud y Herencia di Sclavitud pa expertonan di e Plataforma trece nan conocemento pa pueblo di Corsou y tambe duna splicacion di e rehabilitacion di Tula. Meta di siman di Cultura pa Pueblo di Corsou ta pa fomenta un comunidad vibrando y inclusivo, pa medio di reuni diferente gremio den nos comunidad hunto.
Asina crea conexionnan cu balornan manera respet mutuo, comprension pa otro, reduci prehuicio, reforsa un sintimento di identidad colectivo y stimula intercambio entre nos.
Gobierno di Corsou ta haci un yamada na pueblo pa durante di e siman aki pueblo yuda duna contenido na Siman di Cultura poniendo atencion riba educacion y participacion cultural cu enfoke riba e balornan cu nos heroe Pasional a siña nos. Tur esaki den un ambiente positivo cu otro, haciendo traspaso di conocemento riba nos historia y cultura, nos tradicionnan y formanan di arte, pa asina nos preserva esakinan pa generacionnan futuro.
Siman di Cultura cu un programa varia:Tayernan ku ta pone enfoke riba nos Cultura,Conferencianan y presentacionnan cultural,Actividadnan interactivo riba diferente aspecto di nos cultura cu por tuma luga den scolnan,Bario y Centronan di Bario, na oficinanan, den casnan di cuido,Riba plenchinan y centronan cultural,Artistanan den tur ramo di arte,Centronan Pre Escolar, Scol y actividadnan despues di scol,Hobennan di Corsou y Club di damas,Organisacionnan Gubernamental y No gubernamental,Organisacionnan Cultural, Organisacionnan di Deporte, Institutonan intramural ( Manera Prison, GOG, Cas di Grandinan etc etc),Companianan, hotelnan y tur cu ta sinti nan yama pa participa. Den poco palabra henter pueblo di Corsou
1 comment
[…] Source link […]