KRALENDIJK,Bonaire
Na Texel nan a kuminsá un investigashon pa loke ta trata kultivo ku ta apropiá pa kultivá bou di sirkumstansianan boneriano. Salt Farm Foundation a tuma un fasilidat di prueba na e isla hulandes aki den uso. Esaki ta konsistí entre otro di un ‘greenhouse’ den forma di un tùnel, den kua ta simulá e kalor di Boneiru. Pa por yega mas serka posibel di e situashon berdadero nan ta traha tambe ku awa brak.
Kolegio Ehekutivo ta haña ku e inisiativa aki ta bon biní. ‘Ya kaba nos ambishon tabata pa promové agrikultura lokal, pasobra e ta mas sostenibel i mas salú i e ta hasi nos ménos dependiente di suministradónan for di den eksterior. E krísis di corona ta konfirmá e nesesidat pa produsí produktonan fresku mas tantu posibel lokalmente. Ademas esei ta trese mas empleo nobo kuné i e ta kontribuí na e diversifikashon deseá di nos ekonomia’.
Un bishita di trabou na e fasilidat di prueba na Texel por lo pronto no ta posibel. Pa e motibu aki e diputadonan James Kroon i Elvis Tjin Asjoe huntu ku Maurice Adriaens (Lider di proyekto Reorganisashon LVV) via un ‘videocall’ a papia ku e fundadó di Salt Farm Foundation, Marc van Rijsselberghe. Na luna di febrüari e tabata na Boneiru kaminda el a duna un presentashon na algun desena di kunukero, kendenan ta partisipá na un prueba ku e mes simianan ku awor aki nan ta hasi prueba kuné na Texel. Den e último lunanan di e aña aki mester bira evidente kua ta e posibilidatnan pa kultivá mata ku ta tolerante pa salu na Boneiru.
Salt Farm Foundation ta un fundashon idealista ku nan a lanta pa kompartí konosementu ku kunukeronan ku ta traha riba eskala chikitu, prinsipalmente den áreanan kaminda tin skarsedat di kuminda, kontribuí na kombatimentu di pobresa i desaroyá solushonnan pa e efektonan di kambio di klima. E organisashon a kuminsá un investigashon tambe pa loke ta trata kultivo di lima (alga di laman) komo materia prima pa mèst, di manera ku nos kunukeronan na Boneiru no tin mester di importá esaki mas kontra gastunan haltu.
Na aña 2015 Salt Farm Foundation a bishitá Boneiru pa promé biaha. Esei a sosodé riba petishon di e sekretario di estado di Asuntunan Ekonómiko di e tempu ei, Sharon Dijksma. E interes di e fundashon pa Boneiru por konta ku sosten di ministerio di Agrikultura, Naturalesa i Siguridat di Kuminda. Desaroyo i profeshonalisashon mas aleu di agrikultura, krio di bestia i peska ta un di e prioridatnan den e Akuerdo Intergubernamental 2018-2022 ku a sera ku ministerio di Asuntunan Interno i Relashonnan den Reino.
Despues ku ya kaba Boneiru a keda konfrontá ku e konsekuensianan fastioso di seramentu di frontera di parti di Venezuela pa suministro di bèrdura i fruta, e krísis di corona aktual ta alentá Kolegio Ehekutivo pa anda mas rápido ainda pa bira outosufisiente pa loke ta trata produktonan di promé nesesidat.
