E proyekto di Movementu Kousa Promé “Lamantá pa Wezi” ku ta nifiká man na obra, a ranka sali ayera tardi na Duminguitu Papayaweg 14. Kursistanan ku a inskribí pa e lèsnan práktiko di obra di man a bini huntu pa sigurá nan partisipashon serka e artista i artesano Irene Martha. Nan lo siña desaroyá nan talento kreativo i haña instrukshon kon traha e materia prima pa finalmente elaborá e obranan artístiko. E intenshon di e proyekto ta pa yega na un koperativa di artesano i demostrá balor di traha huntu i mustra ku yu di Kòrsou por siña otro i por traha huntu. Un kantidat di 45 partisipante repartí den den 3 grupo di alrededor di 15 partisipante pa grupo ta bai forma parti di e promé siklo di e kurso. E lèsnan ta tuma lugá riba djaluna i djárason di 9’or pa 12’or i riba djasabra e lèsnan ta atardi di 4’or pa 7’or. Den e kurso partisipantenan ta bai siña téknikanan moderno pero tambe kon nan mes por produsí nan materia prima ku ta hopi importante den e proseso pa yega na nan obra artístiko. Na desèmber lo klousurá e promé siklo ku un grandioso eksposishon. Na final di e kurso kursistanan lo risibí un sertifikado.
