ORANJESTAD,Aruba
Aruba Airport Authority N.V. brindando ayudo na 70 famia cu pa motibo di e
crisis actual ta den necesidad. Un proyecto comunitario di ayudo door di Aruba Airport Authority N.V. (AAA) su staff completo, yama “Wings of Hope” (WoH) a lanta buelo dia 1 di Juni, 2020. Un iniciativa cu a cuminsa den AAA su Unidad di Seguridad tabata e base cu a sende e motornan pa un proyecto di escala mas grandi cu awo a wordo adopta pa e compania completo cu e unico meta pa asisti y yuda rond di 70 famia cu door di e crisis actual ta den necesidad. WoH lo keda activo for di 1 di Juni, 2020 pa 31 di December, 2020.
E efectonan devastador di COVID19 riba e mundo di biahe y aviacion a causa cu AAA mester a tuma medidanan dificil pa proteha e compania su stabilidad financiero. Apesar di e diferente cortenan monetario, AAA toch ta kere fuertemente cu e ta su deber y responsabilidad pa yuda esnan cu ta pasando den temponan dificil actualmente y cu a wordo mas afecta mas fuerte door di e crisis.
AAA a aserca Departmento di Asuntonan Social (DSZ) pa brinda voucher di comestibles na un total di 70 famia over di un periodo prolonga. DSZ lo identifica e famianan cu e necesidad di mas grandi y lo distribui e vouchernan entre su clientenan. AAA su WoH workgroup lo continuamente monitoria e execushon y distribushon corecto di e vouchernan y lo pasa riba reportahenan mensual cu DSZ lo brinda.
Durante e entragemento di e prome vouchernan na DSZ, AAA su CEO Sr. Joost Meijs, a indica cu e ta hopi orguyoso di WoH y e ta spera cu esaki lo ta un inspiracion pa otro organisacionnan local pa tambe yuda. “E ta facil pa yuda ora un compania ta bayendo bon, pero e ta mas dificil pa yuda ora cu e propio famia di AAA tambe ta pasando den momentonan dificil,” Sr. Meijs ta spera cu e ayudo aki lo yuda e famianan surpasa e momentonan dificil aki, mescos cu AAA lo haci na su debido tempo.
