Recientemente Universidad di Aruba hunto cu e Comision Conscientisacion Sclavitud na Aruba di Ministerio di Finansa y Cultura, a organisa un anochi informativo na unda dr. Coen van Galen di Universidad di Radboud di Nijmegen a duna un charla titula ‘Grenzeloze Slavernij en Vrijheid in de Cariben’. Dilanti un sala yen di interesado, dr. Van Galen a brinda splicacion riba e proyecto pa conecta e archivonan di e Paisnan den Caribe cu e meta pa haya sa mas di e migracion di persona cu a tuma luga despues cu Sclavitud a wordo aboli den Caribe.
Sr. Van Galen a splica cu te cu awo e proyecto pa conecta e archivonan ta consisti di un Netwerk Internacional di Archivo entre Surnam y Corsou. Na e momentonan aki ta trahando pa Aruba tambe por conecta na e netwerk aki. Sigur awor cu Aruba a haci avancenan grandi riba e tereno pa digitalisa y haci nos documentonan historico accesibel, lo ta ideal pa Aruba su informacion historico tambe por ta accesibel riba e netwerk internacional aki.
E coneccion di archivonan aki ta importante pa tur esnan cu kier haya sa mas di nan antepasadonan y nan link cu e islanan den Caribe. E informacion ta importante tambe pa por haci investigacion na structuranan den sociedad despues di e abolicion di sclavitud. Di e manera aki lo por haya un bista tambe con sclavitud y colonialismo a afecta e generacionnan despues di abolicion di sclavitud y te cu awor.
Minister Maduro ta gradici dr. Van Galen pa e splicacion amplio y su interes pa Aruba tambe por ta conecta na e netwerk internacional aki. Durante e charla, Minister Maduro a splica esnan presente riba e trabounan importante cu Biblioteca Nacional Aruba BNA y Archivo Nacional Aruba ANA ta haciendo pa digitalisa y haci nos herencia cultural accesibel. E mandatario a invita tur presente pa mira e 2 programanan special ‘Haci nos herencia cultural accesibel,’ cu a wordo pasa na television pa informa riba e esfuersonan haci pa digitalisa y haci nos herencia cultural accesibel. Por mira tur dos parti di e programa via e youtube di Minister Xiomara Maduro.
