Rapòrtnan resien ta hala atenshon riba e plamamentu preokupante di e koral suave invasivo, Unomia stolonifera, ku aktualmente ta destruyendo e ekosistemanan marino di Venezuela i ku nan a deskubrí na Cuba. Mirando e potensial menasa ku esaki por plama i yega e islanan di Karibe (Hulandes), akshon i konsiensia urgente ta esensial pa protehá e biodiversidat marino i ekonomianan lokal kontra konsekuensianan katastrofal.
Espesienan invasivo ta bestia òf mata for di un otro parti di mundu ku no ta pertenesé den nan ambiente nobo. E espesienan akí por tin konsekuensia ekológiko grandi pa motibu ku nan ta redusí e flora òf founa endémiko ku kantidatnan grandi. Nan por okashoná pèrdida ekonómiko grandi tambe i influensiá salú di hende. Espesienan invasivo ta forma un menasa konsiderabel tambe pa ekosistemanan marino rònt mundu, inkluso e área di Karibe Hulandes. Entre e invasornan akí tin e espesie oktokoral Unomia stolonifera òf ‘Pulsing Xenia”, originalmente prosedente di Indo-Pasífiko. Ku su kresementu rápido i falta di enemigu natural, e espesie akí por kaba ku espesienan endémiko i destrosá habitatnan marino vulnerabel manera kama di yerba di laman i ref di koral.
Bèkgrount
E koral invasivo suave U. stolonifera a keda identifiká pa promé biaha na aña 2014, dilanti di kosta di Venezuela. Nan ta kere ku su introdukshon a tuma lugá via komèrsio ilegal di akuario. Pa motibu ku e espesie akí por reprodusí seksualmente i aseksualmente (òf den forma fragmentario), asta pida pida chikitu por regenerá i plama. Una bes ku e keda introdusí, rápidamente e ta tuma ref den awa plat i supstrato duru over na un profundidat di 0 te 50 meter, di manera ku e ta hala koral lokal i yerba di laman un banda pa haña espasio. For di investigashon di kontinuashon a resultá ku e tipo di koral akí tabata mustra un porsentahe di kobertura promedio di asta 80%, superando ampliamente e koralnan endémiko. Den áreanan fuertemente kolonisá, piská ta disparsé komo konsekuensia di pèrdida di nan habitat.
Na aña 2022 durante un investigashon ku Universidat di Havana a hasi na Cuba, nan a deskubrí un oktokoral deskonosí ku despues nan a identifiká komo e Unomia stolonifera invasivo. Nan ta sospechá ku e larvanan di koral a yega den awa di balaster di barku ku kombustibel fósil prosedente di Venezuela, mirando ku e invashon a afektá sitionan pegá ku hafnan Venezolano gravemente.
Kon pa yuda
Prevenshon pa medio di monitoreo kontinuo, prinsipalmente den áreanan ku riesgo haltu, manera haf di laman i instalashon petrolero, ta di mayor importansia. Detekshon na tempu ta hunga un ròl fundamental den kaso di limitashon di e menasa ku ta bini di Unomia stolonifera.
Enbolbimentu i konsientisashon di públiko tambe ta vital. Ta stimulá komunidatnan lokal, sambuyadónan rekreativo, turista i tur stakeholder pa partisipá na esfuersonan tempran di detekshon pa medio di mèldu opservashon (potrèt, sitio i fecha) di e koral invasivo akí na nan respektivo Organisashon di Maneho di Área Protehá (Protected Area Management Organization – PMO): Fundacion Parke Nacional Aruba (FPNA), STINAPA Bonaire, CARMABI Curaçao , Saba Conservation Foundation (SCF), Nature Foundation St. Maarten (NFSXM) i St. Eustatius National Parks (STENAPA). Si nan konfirmá un área invadí, bo ta sigui e rekomendashonnan di e PMO-nan lokal.
Yabi pa éksito
No opstante e retonan, detekshon tempran ta e yabi pa limitá e menasa di Unomia stolonifera. Ku vigilansia, investigashon i enbolbimentu kontinuo di parti di komunidat, tin speransa pa logra haña e potensial problema akí bou di kontròl, promé ku e bira un menasa mas grandi.